DILI, STLTIMORLESTE.com – Profesores balun hanorin iha area remotas ho distansia neebe dook, husi sira nian hela fatin no ba eskola, tanba nee sei halo rezidensia ba sira hodi fasilita sira nian servisu ho diak liu tan.
Miguel Freitas nuudar Diretor Servisu Edukasaun Munisipiu Bobonaro hatoo asuntu nee ba STL liu husi telefone, Kuarta nee (17/06/2026).
“Kona-ba distansia no sira nian hela fatin nee atende ona balun, tanba iha eskola lima ka neen iha ona planu atu tau rezidensia ba ita nian profesores sira nee iha eskola ida-idak, nee ba tinan ida nee, ezemplu hanesan eskola sira iha Munisípiu Bobonaro, hanesan Hauba, Kolimau, Palaka, Postu Kailako, Bobonaro, nee trasa hotu ona, nee ba ita nian profesores bolsa kandidatu sira nian fatin, nee ba ita nian profesores nivel ensinu baziku ninia,” dehan nia.
Miguel akresenta, nee duni rezidensia nee sei tau uluk prioridade ba bolsa kandidatu profesores neebe mak hanorin iha area remotas ho distansia sira nian hela fatin no eskola neebe dook, planu ida nee husi parte infraestrutura nasional, sira mak hatun despaisu ida nee mai, nee planu 2026 nian katak, atu halo rezidensia ba profesores sira iha eskola neen ka hitu, depois mak sei halo kontinuasaun.
Iha fatin seluk, Diretor Servisu Edukasaun Munisípiu Ainaro, Patricio da Costa Magno katak, manorin bolsa kandidatu husi eskola sira iha Munisípiu Ainaro kestiona laiha rezidensia ba Servisu Edukasaun Munisípiu Ainaro, tanba durante sira aluga uma no balun komunidade mak oferese fatin ba sira.
(jac)
