Profesores La Kompletu, Sala Mamuk

Profesora hanorin hela estudante sira. (Foto: solopos.com)

DILI, STLTIMORLESTE.com – Bainhira profesores la kompletu automatikamente sala ida rua mamuk, no estudante sira la hakmatek iha sala laran.

Kestaun nee hatoo husi Koordenador Eskola Baziku Filial (EBF) Fatumeta, Jose Manuel Pires ba STL iha nia knaar fatin Fatumeta, Kinta nee (30/01/2025).

“Ami nia difikuldade mak atu aumenta tan profesores, tanba dala ruma profesores la tama sala, nee ita hatene ona, kuandu labarik tur kleur ona iha sala nee sempre lao ba mai deit iha sala la hakmatek, ida nee mak difikuldade, bainhira profesor laiha nee difikuldade ida mai ami profesores sira hanorin iha klase sorin, bainhira profesor la tama, estudantes barulhu, no klase sorin la konsentrasi ona,” dehan nia.

Nia hatutan, bainhira profesor la kompletu nee sala ida rua tenke mamuk, kuandu sala ida rua mak mamuk nee labarik la hakmatek, ida nee mak sira nian problema esensial neebe mak sira hasoru loron-loron, nee duni profesores la tama nee estudantes sira tur la hakmatek iha sala laran.

“Maibe ohin profesora ida mai tan, ita dehan sufisiente ou la sufisiente natoon ona ba ami, maibe ami sei presiza tan profesores nain ida ou nain rua, rua nee sufisiente ona, atu nunee bele tama hotu iha sala, ho nunee ami labele preokupa tan ho profesor ona, nee duni ami hakarak atu aumenta professor nain ida, no ohin nain ida mai tan ona iha nee,” katak nia.

Iha fatin seluk, Kordenador Ensinu Baziku Filial (EBF), Hans Klemm Bairo Pite, Lucas Brandao da Silva dehan, profesores nain lima neebe mak mai nee seidauk sufisiente, karik nain tolu mak tama reforma, nain tolu tenke subtitui iha sira nian fatin se lae sala tolu mak mamuk, nee duni husu Ministeriu Edukasaun presiza koloka tan profesores hodi subtitui profesores reforma.

(jac)

Share it :

Leave a Reply

Your email address will not be published. Required fields are marked *