DILI, STLTIMORLESTE.com – Oras nee daudaun profesores nain lima (5) husi Ensinu Baziku Filial (EBF) nu. 5 Comoro ho kondisaun moras la ativu iha prosesu aprendizajen.
Hatete Koordenador EBF nu. 5 Comoro, Marcelino Moniz ba STL iha nia knaar fatin, Kuarta nee (01/07/2026).
“Ami nian profesores sira daudaun nee sufisiente hela, total profesores hanorin iha eskola ida nee hamutuk 55, maibe ita nian profesores nain lima (5) mak ho kondisaun moras no la tama hanorin, nee duni ativu nee 46, ida profesores disiplina hau rasik, depois nain rua lisensa maternidade, sira fulan Julhu mak sei tama fali hanorin estudantes sira, nee duni ita nian profesores 47 nee kaer disiplina ida-idak,” nia dehan.
Aleinde nee mos hatan konaba asuntu konsesaun eskolar ninia nee relatóriu ba primeiru ano nee husi eskola submete ona ba ME, agora hein fali ba iha segundu periodu ninia, tanba osan nee rasik seidauk sai, bainhira sai mak foin bele ba sosa sasan neebe presiza uza ba tuir nesesidade eskola nian.
“Osan ba segundu periodu nian nee ami seidauk simu, maske relatóriu ba primeiru nian nee ami submete ona ba iha ministériu, maibe la fo influensia ba avaliasaun, tanba daudaun nee sira iha surat tahan, lapijera, nee iha kompletu,” nia afirma.
Iha fatin seluk, Diretor Servisu Edukasaun Munisipiu Ainaro, Patricio da Costa Magno dehan, iha eskola balun presiza aumenta profesores, tanba profesores balun reforma ona no balun ho kondisaun moras labele ativu iha eskola, maibe iha eskola balun profesores sufisiente ona no balun mak ba oin tenke aumenta profesores, ho nunee bele halao ensinu aprendizajen ba estudantes sira.
“Iha ita nian eskola balun presiza aumenta profesores, tanba profesores balun reforma ona no balun ho kondisaun moras labele ativu iha eskola, maibe iha eskola balun profesores sufisiente ona no balun mak ba oin tenke aumenta profesores, ho nunee bele halao ensinu aprendizajen ba estudantes sira,” nia deklara.
Nia dehan, iha eskola balun sei menus profesores, nee balun ME rezolve daudaun ona ho bolsa kandidatu profesores neebe mak iha ona, tanba dala ruma profesores balun neebe mak ho kondisaun moras labele hanorin, nee sira neebe koloka ba eskola nee bele substitui fali iha sira nian fatin, nunee ensinu aprendizajen iha eskola lao diak hanesan baibain.
(jac)
