DILI, STLTIMORLESTE.com – Ministru Interior (MI), Francisco da Costa Gusterres hatete, kona-ba prosesu konstrusaun ba infraestrutura ba Polisia Nasional Timor Leste (PNTL) hahu husi Fronteira mak mai Nasional, tanba reabilitasaun ba Postu Unidade Patrulhamentu Fronteira (UPF) hamutuk 47 iha Fronteira.
Nia dehan, progresu konstrusaun ba infraestrutura Polísia Nasionál Timor Leste (PNTL) hahú husi fronteira mak mai Nasionál.
“Ita hahu halo ona reabilitasaun ba Postu Unidade Patrulhamentu Fronteira (UPF) hamutuk 47 iha fronteira,” hatete Ministru Interior, Francisco da Costa Guterres ba jornalista sira, iha SFP Komoro, Dili,Tersa (11/2/2025).
Nia dehan, rezolve uluk problema infraestrutura iha fronteira, tanba sira nia kondisaun mak aat liu, uma nakfera hotu, fatin laiha, dapur laiha, ahi laiha no bee mos la iha.
“Agora ita tenke buka para hadia infraestrutura hirak nee kompleta no fasilidade sira,” nia esplika.
Ministru nee informa, husi Postu 47 nee reablita ona 41, falta 6, tanba presiza dezenhu husi ADN.
Antes nee, Komandante Jeral Polísia Nasionál Timor Leste (PNTL), Komisariu Henrique da Costa esplika, infraestrutura PNTL nee barak seidauk diak.
“Balu infraestrutura diak ona, maibe fasilidade laiha, tanba buat sira nee presiza hadia no kompleta,” nia deklara
Nia hatutan, postu iha fronteira nee hamutuk 87 ho kondisaun la diak, maibe membru PNTL liu-liu Unidade Patrulhamentu Fronteira (UPF) nafatin ezekuta orden komando nian hodi kontrola atividade hotu iha fronteira.
(jen)
