BAUKAU, STLTIMORLESTE.com – Projetu reabilitasaun estrada husi Postu Administrativu Laga ba Postu Baguia neebe implementa iha tinan 2022 foin atinji 45%, tanba impaktu husi problema sosial sira.
Project Manager Kompanhia Norinco, Song Long esplika, projetu reabilita estrada Laga-Baguia kona-ba servisu estrutura kompanhia remata ona monta drainajen, klining no grave husi kilometru 1 too 38, enkuantu nahe’e aspal finaliza ona kilometru 7 iha area Postu Administrativu Laga.
“Progresu agora daudaun nee ami hetan ona 45%, fulan ida nee la udan ona entaun ami koko atu fo progresu neebe substansial,” hateten Song ba STL iha Postu Administrativu Laga, Kuarta (11/06/2025).
Nia rekonhese, implementasaun projetu reabilitasaun estrada Laga-Baguia ho duransaun tinan 2 neebe tuir planu remata iha tinan 2024, maibe la finaliza tuir kontratu neebe iha, tanba impkatu sosial.
Nia sublina, impaktu sosial ho tuir trabalhador sira baruk servisu, joven barak ezije hakarak servisu, hanesan kompahia ho asaun forsada hodi impede servisu, tanba razaun kompanhia la fo servisu, maibe tuir kontratu selebra ho Governu kompanhia bele fo servisu ba trabalhador kuaze nain 300 iha kilometru 38, maibe mosu joven barak hakarak servisu.
Aleinde mos komunidade afetadu 33 no mosu tan lista foun neebe too ohin loron seidauk simu indemnizasaun husi Governu, tanba nee komunidade sira la oferese fatin ba kompanhia halo alargamentu estrada inklui fatin lulik balun neebe sei impede servisu, tanba kompanhia labele book halo alargamentu estrada ho razaun fatin lulik.
“Ekipamentus sira kuaze prienxe kriteira hamutuk unidade 80 resin kompletu iha terenu, kona-ba ekipamentus laiha problema, maibe impedimentu sosial mak afeta progresu,” Song akresenta.
Nia argumentu, problema sosial hirak nee relata ona ba Autoridade Suku, Postu no too ona Nasional atu solusiona, maibe parte kompanhia seidauk hetan informasaun.
Administrador Postu Administrativu Baguia, Mario Xavier da Silva hateten, kona-ba problema sosial neebe kauza husi sidadaun sira husu servisu ba kompanhia, maibe kompanhia la simu hodi implika ba progresu fiziku, tanba kompanhia rasik la esplikasaun klaru regras presiza deit trabalhador nain 300 resin ba distansia kilometru 38 husi Laga too Baguia.
“Nee tenke kompanhia mak esplika klaru ba ema sira item servisu sira nee presiza ema sekian para ema bele hatene, entaun ita bele dehan kompanhia falha iha koordenasaun ba ema neebe hakarak servisu,” hateten Mario.
Autoridade Postu Baguia nee katak, fo impaktu ba servisu reabilitasaun estrada refere tarde, tanba lista komunidade afetadu faze segundu nian husi Postu Baguia submete ona ba Ministeriu Obras Publikas, maibe seidauk fo indemnizasaun, tanba nee iha area komunidade afetadu parte kompanhia seidauk halo alargamentu.
Aleinde impaktu seluk mak kondisaun iklima iha Postu Administrativu Baukau daudaun kontinua udan la fo tempu kompanhia atu halao servisu.
Enkuantu projetu reabilita estrada Laga-Baguia lansa fatuk dahuluk iha tinan 2022 ho durasaun tempu servisu fulan 24 neebe responsabiliza husi kompanhia Norinco International Cooperation no hetan suprevizaun husi Kompanhia PT. Inacon Luhur Pertiwi, JV Kai Watu Kmanek Consultant, Unip. Lda, no PT Sinotech Engineering Indonezia, ho valor orsamentu US$ 21,695,194.98, neebe hadiak ho luan estrada metru 7, kompostu alkatraun metru 4, alargamentu metru 1 no ombru metru 2 ba distansia estrada kilometru 38.3 husi area Postu Laga too Baguia.
(tom)
