BAUCAU, STLTIMORLESTE.com – Projetu konstrusaun salaun Komisaun Nasional Eleisaun (CNE-sigla português) Munisipiu Baucau laiha kuadru projetu iha fatin konstrusaun.
Tekniku kompanhia Remares Unipessoal Lda, Fonsiano António Magno Ximenes aprezenta, projetu konstrusaun salaun CNE Munisipiu Baucau hahu konstrui iha fulan Junhu too ohin loron progresu fiziku seidauk atinji 05%, tanba parte fondasi foin konklui atu hakat ba servisu sinta dahuluk nian.
“Implementasaun projetu ida seidauk atinji 05%, sim laiha kuadru projetu,” hateten Fonsiano António Magno Ximenes ba Jornalista sira iha fatin konstrusuan Vila Nova Baucau, Tersa (07/07/2026).
Nia informa, mezmu laiha kuadru projetu iha fatin konstrusuan, maibe garante projetu refere remara tuir data kontratu neebe kompanhia ho Governu selebra ba durasaun servisu fulan neen, tanba kompanhia iha kapasidade husi alokasaun material konstrusuan iha fatin konstrusaun atu badaen sira kontinua ativu iha servisu.
“Total orsamentu gastu ba projetu ida nee mak ita la hatene, nee so diretor mak bele hatene,” Fonsiano informa.
Nia komenta, total orsamentu neebe atu gastus ba projetu refere nia parte la hatene, tanba iha fatin konstrusaun, parte nain ba kompanhia la estabele kuadru projetu. Maibe garante parte kompanhia sei hadia erru refere iha tempu badak sei monta kuadru projetu iha fatin konstrusaun.
Iha sorin seluk, Diretor CNE Munisipiu Baucau, Esmeraldo Damião Belo informa, projetu refere implementa hetan alokasaun orsamentu husi CNE ho valor rihun US$ 100 responde ba konstrusaun salaun medida 15X15.
“Kuadru projetu laiha ita mos preokupa, maibe haree sira mos servisu barak dala ruma preokupa nee mak seidauk tau, maibe hau mos ezije sira tau kuadru para ita hatene,” Esmeraldo komenta.
Nia informa, konstrusaun salaun CNE Baucau neebe parte kompanhia ho CNE selebra kontratu ba durasaun servisu filan neen tuir planu sei termina iha Dezembru 2026, nunee iha inisiu tinan 2027 bainhira Prezidente Republika anunsiu ona loron eleisaun Prezidensial, Munisipal no Parlamentar, CNE Baucau sei utiliza salaun refere hodi halao enkontru ho estrutura partidu politiku sira iha Munisipiu Baucau.
(jen)
