BAUKAU, STLTIMORLESTE.com – Diresaun Turizmu no Ambiente submete ona proposta ba Ministeriu Turizmu no Ambiente (MTA), hodi reabilita fatin turizmu Liria no fatin turizmu relijiozu Ariana.
Diretor Diresaun Turizmu no Ambiente ba rejiaun ida, Carlito Pereira esplika, inisiu tinan nee Diresaun Turizmu Ambiente simu proposta husi Autoridade Suku no Postu iha Munisipiu Baukau hamutuk rua, kompostu fatin turizmu Liria tasi ibun Suku Kaibada, Postu Administrativu Baukau Vila no fatin turizmu relijiozu Ariana Postu Venilale neebe sumbete ona ba Ministeriu hodi halo reabilitasaun.
“Proposta mai ona ita relata tiha ona ba Nasional ita hein deit Planeamentu estimasaun ba Orsamentu no hein ekipa mai fali haree fatin nee oinsa mak hadia fila fali ita hein,” hateten Carlito ba STL iha Vila Nova Baukau, Segunda (09/06/2025).
Nia sublina, fatin turizmu rua refere prezisa Governu tau atensaun liu husi reabilitasaun, tanba iha loron ferias liu liu loron Sabado no Domingu hetan vizitante barak husi komunidade lokal, nasional inklui internasional, maibe kuaze fatin turizmu rua refere menus fasilidade atu fasilita vizitante sira.
“Ita hadia para vizante sira sente, passa feiras nee mos iha folin, se vizitante sira ba mak casa de banho laiha sira ba dala ida deit lakohi ba ona,” Carlito fundamenta.
Nia akresenta, bainhira Governu liu husi Ministeriu foti medida halo intervensaun liu husi reabilitasaun ba fatin turizmu rua refere, sei entrega ba Autoridade Munisipiu hodi jere nunee bele fo reseitas, tanba prosesu reabilitasaun gastus orsamentu, bainhira Autoridade kria regras liu husi reseitas bele halo manutensaun ba fasilidade sira bainhira avaria, tanba regras ba reseitas husi nivel nasional sei iha faze diskusaun.
“Ate a data ita lei ba turizmu sei iha parlamentu mais ida nee loloos kompentensia Autoridade tenke tau regulamentu, tanba nee ba Munisipiu nian, Munisipal iha ona ba area sitiu turiztiku sira,” Carlito hakotu.
(tom)
