Ramos-Horta Kongratula Angola Selebra Indepedensia ba Dala 51

Prezidente Republika Jose Ramos Horta. (Foto: STL/Emerenciana Pinto)

DÍLI, STLTIMORLESTE.com – Prezidente Repúblika (PR), Jose Ramos Horta hato’o parabens no Kongratula ba povu Angola ne’ebé selebra aniversariu Independensia ba dala 51.

Iha biban ne’e Prezidente José Ramos-Horta destaka solidariedade istórika no amizade entre Timor-Leste no Angola durante selebrasaun independénsia Angola nian.

Prezidente Repúblika, José Ramos-Horta, hato’o mensajen solidariedade no parabéns ba povu angolanu, iha selebrasaun tinan 51 Independénsia Repúblika Angola nian, ne’ebé hala’o iha Hotel Timor, Dili, Kinta-feira kalan (19/11/2026).

Iha nia diskursu, Ramos-Horta afirma katak relasaun entre nasaun rua ne’e la’ós de’it bazeia ba lian Portugés no membru Komunidade Países de Língua Portuguesa (CPLP), maibé iha abut kle’an iha esperiénsia istórika no luta komún ba liberdade.

“Ami la haluha Angola nia apoiu ba ami nia kauza,” deklara Ramos-Horta, hodi lembra apoiu diplomátiku no solidariedade Angola nian ba povu Timoroan durante luta ba restaurasaun independénsia.

Nia esplika katak, Angola hamriik iha Timor-Leste nia sorin bainhira liberdade povu Timoroan nian sei sai aspirasaun no presiza apoiu hosi komunidade internasionál.

Tuir Ramos-Horta, solidariedade ne’e reprezenta patrimóniu morál no polítiku ne’ebé nasaun rua tenke preserva no transmite ba jerasaun foun sira.

Nia mós destaka katak, nasaun rua iha esperiénsia komún kona-ba konflitu, rezisténsia, rekonsiliasaun nasionál no konstrusaun instituisaun demokrátika.

Prezidente ne’e subliña katak, independénsia polítika importante tebes, maibé konstrusaun nasaun ida presiza pás, unidade nasionál, instituisaun forte no oportunidade ekonómika ba populasaun.

Ramos-Horta afirma katak, Timor-Leste rasik komprende di’ak sakrifísiu ne’ebé povu Angola halo durante luta ba liberdade, tanba Timor-Leste mós enfrenta okupasaun no rezisténsia durante dékada barak.

Iha parte seluk, Prezidente Timor-Leste nian hateten katak, amizade entre nasaun rua la bele limita de’it ba memória istórika, maibé tenke kontinua dezenvolve liuhosi asaun no kooperasaun konkretu.

Abertura Embaixada Angola nian iha Dili, iha Maiu 2025, reprezenta pasu importante ida atu hametin ligasaun diplomátika no fasilita diálogu entre governu rua.

Nia mós temi prezensa diplomátika Timor-Leste nian iha Luanda nu’udar mekanizmu importante atu hametin koordenasaun no kooperasaun bilaterál.

Ramos-Horta lembra katak, nia vizita estadu ba Angola, iha Jullu 2024, fó oportunidade atu komprende kle’an liután realidade Angola nian no identifika potensiál kooperasaun entre nasaun rua.

Nia afirma katak, Timor-Leste no Angola iha responsabilidade komún atu konsolida sira-nia realizasaun istórika no asegura futuru ne’ebé di’ak ba jerasaun sira tuirmai.

Selebrasaun ne’e sai mós oportunidade atu reafirma kompromisu nasaun rua nian ba amizade, solidariedade no kooperasaun internasionál.

(eme)

Share it :

Leave a Reply

Your email address will not be published. Required fields are marked *