DILI, STLTIMORLESTE.com – Rede Feto Soru nain 12 husi Oekusi-Ambeno prontu tuir formasaun durante loron 2, iha Edifisiu Timor Aid, Dili.
Paulina Elu nuudar Visi Koordenador Soru Nain Oekusi dehan, daudaun nee nia ho ninia membru Feto hamutuk 12 jusi Oekusi prontu ona atu tuir formasaun ho feto soru nain sira husi 14 munisipiu.
“Ami husi Feto Soru Nain Oekusi hamutuk 12 sei tuir formasaun konaba soru tais durante loron 2 nia laran neebé organiza husi Timor Aid, atu hasae kapasitasaun soru tais ba feto soru nain sira husi area rurais,” dehan Paulina Elu ba STL iha Jardim 5 de Maiu Dili, Segunda (9/12/2024).
Nia dehan, grupu soru nain husi Oekusi ho naran Rede Soru Nain Oekusi eziste iha tinan 2019, neebe hetan ona legalidade iha loron 20 Agostu 2023, oras nee halao servisu soru tais iha Oekusi-Ambeno.
“Ami nia grupu nee eziste iha tinan 2019 no hetan legalidade iha loron 20 Agostu 2023, ho atividades mak soru tais feto no mane inklui mos salendang. Agora daudaun hetan suporta husi UN Women, Timor Aid, apoiu fatin marketing iha Loja Pateo, tanba nee tais neebé soru iha Oekusi faan iha Loja refere,” dehan nia.
Nia dehan, treinamentu nee tuir ba dala 5 ona, oinsa kapasita feto maluk sira konaba soru tais.
No tais neebe mak produs husi Oekusi konhesidu ho Bete Bose ho nia salendang presu US$ 120, Bete Pasbola Orijinal Oekusi nian par ho salendang presu US$ 100, tais feto par ho salendang presu US$ 50, taplak meja folin US$ 15, Selendang Kiik presu US$ 10.
Maibe oras nee Timor Aid suporta tan grupu Soru Nain Sira husi 14 munisipiu hodi hasae konhesimentu kona-ba Soru tais, nuudar feto Oekusi sente previlejiu liu Tan atu promove tais Timor nuudar identidade kultura tais Timor neebé hetan ona rekonhesimentu husi UNESCO.
Iha oportunidade nee, Eliza Neno nuudar feto Soru Nain husi Suku Lifau, Sente kontente, tanba liu husi grupo Soru Nain Nia hetan oportunidade mai iha kapital Dili tuir treinamentu neebe organiza husi Timor Aid iha Dili.
Nunee mos Noviana de Fatima Falo nuudar Joven Feto sente orgulhu envolve aan iha Grupu rede Soru nain tais Oekusi, atu aprende Soru tais promove tais nuudar identidade tais Timor nian iha rai laran nomos ba merkadu internasional.
(jos)
