AMBENO, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu esklarese katak, Polisia Cientifiku Investigasaun no Criminal (PCIC) neebe mak sirku, buska no aprensaun dokumentus balun iha Gabinete Prezidente Autoridade Rejiaun Administrativa Espesial Oecusse-Ambeno (RAEOA) iha Oebau, ida nee dokumentus governu anterior nian neebe deskonfia iha indisus irregularidade neebe Ministeriu Publiku presiza.
“Ita hotu hatene katak IX Governu Konstitusional bainhira hahu pose, kompromisu atu bele harii fali sistema, haree Kontabilidade, hau husu ba povu Oecusse atu lalika hakfodak, tanba ida nee hanesan dever, obrigasaun husi membru governu sira atu bele presta asuntu iha komprimisu kontabilidade ba estadu, tanba knar nee laos ita nian, maibe knar nee povu no estadu ninian, wainhira povu hakarak buka hatene katak, asuntu Kontabilidade ninia performance nee lao diak ka lae, karik iha indisus neebe estadu liu husi Ministeriu Publiku ho ministeriu relevantes haree, presiza klarifika, konfirma ninia lalaok maka tenke hanesan nee, ita labele hakfodak. Hau rasik mos hetan informasaun antes hau moras, iha karta husi Ministeriu Publiku mai hateten katak tenke fornese dokumentus, ida nee ita nia dever no obrigasaun ba estadu,” dehan Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu iha Salaun Convensoens 1 de Maiu Palaban, Suku Costa, Postu Administrativu Pantemakassar RAEOA, Segunda (27/08/2026).
Nia haktuir tan katak, PCIC ohin mai halo buska no aprensaun dokumentus balun neebe sira presiza, laos mai iha PA-RAEA Atual.
“Ohin PCIC mai halo buska no aprensaun dokumentus iha Gabinete PA-RAEOA, ema halo espekulasaun bar-barak dehan PCIC mai kaer hau ona, informasaun nee laloos. Hanesan Autoridade, sempre prontu nafatin kuandu aban bain rua hau sai husi hau nia knar PA-RAEOA, ita labele hakfodak tanba PCIC agora mai nee karik ba asuntu sira neebe iha Autoridade RAEOA pasadu. Hau hateten ba Oecusse oan sira katak Ukun husi Autoridade anterior sira husi Oecusse oan sempre monu fiziku, Bupati sira neebe uluk mos hanesan, ita nuudar servidor povu, labele hases husi estadu hakarak buka tuir estadu nia osan, uluk ita boot sira uza hanesan ita boot sira nia poder atu bele ezerse dever estadu ba povu nee oinsa ona, sei karik iha indisus sei klarifika, la signifika ema balun sala ona, ema komete ona irregularidade, too ikus dalan justisa halo nia serbisu, sei iha provas liu husi dalan justisa neebe maka ita tenke tuir,” afirma nia.
Nia dehan, hanesan Prezidente Autoridade RAEOA atual, karik durante assume mandatu maka halo desizaun salah ka iha indisus balun ke estadu dehan presiza atu provas, prontu atu bele halo.
“Hau prezidente Autoridade RAEOA atual, karik durante hau assume mandatu maka hau halo desizaun salah ka iha indisus balun ke estadu dehan presiza atu provas, hau prontu atu bele halo, neebe lalika hakfodak, tanba nee ohin prezensa PCIC iha Gabinete Autoridade ohin, laiha ligasaun ho hau nian, maibe hanesan prezidente Autoridade, hau laos koalia hanesan Regio maibe hau koalia hanesan PA-RAEOA atual, hau koalia hanesan Autoridade, nee signifika hau responsabiliza ba dokumentasaun, informasaun hotu-hotu, obedesimentu legal administrativu atu bele fornese instituisaun estadu relevannte neebe hakarak buka hatene kona ba saida maka ita presiza atu presta,” dehan nia.
Husu kona ba dokumentus neebe ohin PCIC buska, PA-RAEOA atual dehan nia la hatene, heten deit mandadu atu bele koopera maibe dokumentus saida maka PCIC presiza, nuudar autoridade la hatene no la iha pozisaun atu pronunsia, ida nee pas parte asegura prestasaun de kontabilidade estadu no povu iha RAEOA.
“Hau hanoin, buska no aprensaun dokumentus sira nee, importante, tenki ser serbisu auditoria, serbisu auditoria interna no serbisu ligadu ba komprementa lei no orden, tenki ser lao tuir. Ita boot sira sei rona, hau mos sei hanesan nee, sei rona husi serbisu Ministeriu Publiku, kuandu sira nia serbisu remata tuir lei no regulamentu, Ministeriu Publiku hakarak pronunsia ba publiku, tanba nee ita hotu tuir no akompanhia lai.
PCIC halao mandadu aprensaun no buska dokumentus nesesariu neebe orienta husi Ministeriu Publku iha Gabinete PA-RAEOA iha tuku 7:30 oras Timor Leste (OTL), domina kedan edifisiu Gabinete Autoridade hodi hein Prezidente Autoridade RAEOA, Regio da Cruz Salu neebe too iha nia serbisu fatin Gabinete Autoridade RAEOA tuku 8:30 dadersan, komprementa kedan ho Ekipa PCIC neebe lidera husi Inspektor Xefe Polisia Mario Tavares ho ninia Membru Sira inklui serbisu Nasional Intelijensia (SNI).
Tuir fontes informasaun neebe STL asesu husi fontes neebe lakohi temi naran, serbisu iha Gabinete Autoridade RAEOA Oebau katak, dadersan nee sira hakfodak, derpenti deit PCIC haleu ona Gabinete Autoridade RAEOA, atu halo serbisu mos bandu antes PA-RAEOA too fatin.
“Ami nuudar Funsionariu iha Gabinete Autoridade RAEOA, sente hakfodak, ami Tama officer, sira husi PCIC husu dehan bele Tama iha officer laran, maibe labele book sasan neebe tau iha meja leten,” dehan fontes nee.
Nia haktuir tan katak, ohin PA-RAEOA too nia serbisu fatin, komprementa PCIC lalais deit no PA-RAEOA sai husi Ninia Gabinete ba kedan iha atividades desiminasaun informasaun neebe organiza husi AIFAESA iha Salaun Edukasaun Oecusse.
Iha lokraik nee, bain hira Inspektor Xefe Polisia Mario Tavares asegura ona dokumentus importante sira, deklara ba jornalista sira katak, nia labele halo komentariu sobre atividades aprensaun no buska iha gabinete Autoridade RAEOA.
“Hau sei la halo komentariu kona ba atividades PCIC nian neebe ohin halo buska no aprensaun ba sasan sira iha Gabinete Autoridade RAEOA, tanba prosesu investigasaun sei kontinua lao,” dehan Inspektor Xefe Polisia Mario Tavares.
Tuir observasaun STL iha Gabinete RAEOA, hahu husi dadersan tuku 8:45 too lokraik, Funsionariu Gabinete Autoridade RAEOA lori sai dokumentus sira neebe PCIC presiza husi tinan 2015 nian, liga ho projetu neebe governu anterior lidera husi Mari Alkatiri asume knaar PA-RAEOA dahuluk iha Oecusse.
(jos)
