DILI, STLTIMORLESTE.com – Padre Paul Kerans, SVD hatete, evanjelhu ohin husi Mateus 10:7. Objetivu prinsipal mak atu haklaken katak reinu Lalehan besik ona. Ida nee mak buat foun neebe Kristu lori ba ema Judeu sira, Reinu Lalehan nia mai depende ba sira nia esforsu rasik.
Padre Paul Kerans, SVD ba STL, Kinta (09/07/2026) hatete, evanjelhu Mateus 10:7-15 ohin nian aprezenta parte daruak konaba dixípulu sira-nia enkargu. Horiseik rona katak Jesus orienta Ninia dixípulu sira atu ba uluk nanai bibi malae sira Israel nian. Ohin, simu instrusaun konkretu sira atu halao misaun neeba.
“Ba no haklaken katak Reinu Lalehan besik ona. (Mateus 10:7). Objetivu prinsipal maka atu haklaken katak Reinu Lalehan besik ona. Ida nee mak buat foun neebe Kristo lori mai ita. Ba ema Judeu sira, reinu Lalehan nia mai depende ba sira nia esforsu rasik. Ba ema farizeu sira, Reinu sei hetan deit hafoin obediensia perfeitu ba lei,” dehan Padre.
Maibe Jesus iha maneira ida neebe diferente atu lee faktu sira moris nian. Nia dehan katak tempu too ona (Markus 1:15). Bainhira Nia dehan katak reinu Lalehan nian besik ona ka katak reinu nee iha ona ema nia leet, iha ema nia leet, ida-nee signifika katak ida nee sei mai la haree ba ema nia esforsu sira.
Sinal sira konaba prezensa reinu Lalehan nian mak liuliu asaun ka hahalok konkretu sira, neebe halo ho livre fo isin diak ba ema moras sira, halo mate sira moris hias, hamoos ema moras-lepra sira, duni sai demoniu sira. Nee katak dixípulu sira tenke simu iha komunidade sira neebe esklui tiha ona. Pratika solidariedade ida nee tuir loloos kritika relijiaun no sosiedade neebe esklui grupu ida nee.
“Jesus mos fo hanoin ba Ninia dixípulu sira imi keta lori buat ida iha imi-nia viajen. La hanesan ho misionariu sira seluk, Jesus nia dixípulu sira labele lori buat ida, keta lori osan mean ka osan mutin, ka osan iha imi-nia bolsu, ka saku viajen nian, ka hena ka sandalias ka ai tonka ida, basa serbisu-nain ida-idak merese atu simu ninia salariu.” dehan Padre.
Ida nee signifika katak sira tenke fiar iha ema sira neebe sira hasoru no serbí nia laran-diak. Tan nee, eskolante sira sai la lori buat ida, lori deit PAZ (Marcos 10:13). Ida nee hatudu katak sira tau fiar ba ema. Sira fiar iha Maromak nia grasa neebe atua iha ema sira hodi fo buat neebe sira presiza. Sira sei hetan benvindu, sira sei partisipa iha ema sira iha neeba nia moris no serbisu, no sira sei bele moris ho saida maka sira sei simu fali, tanba traballador merese nia salariu. Ida nee signifika katak dixípulu sira tenke fiar iha fahe, bainhira sira fo ka fahe, sira sei simu.
(eme)
