DILI, STLTIMORLESTE.com – Komando Jeral Polisia Nasional Timor Leste (PNTL) husu Governu liu husi Ministeriu Interior (MI) labele uza sistema familiarizmu wainhira halao rekrutamentu ba membru PNTL foun.
“Ita hakarak rekrutamentu nee tenke transparensia akontavel ba ema hotu-hotu, tanba nee ita husu para ekipa trabalhu husi MI no PNTL ou parseiru sira neebe ita konvida mai atu bele fo asistensia ba ita atu bele halo transparansia,” hatete Komandante Jerál Polísia Nasionál Timor Leste (PNTL), Komisáriu Jerál Polísia Henrique da Costa ba jornalista sira iha SFP Komoro, Dili, Kinta (13/2/2025).
Nia dehan, Komando aprezenta ona kriteriu ba Ministeriu Interior no husu atu haree didiak kriteria neebe Komando aprezenta nee, karik loos ona bele avansa, maibe karik seidauk bele hadia fali, tanba Komado Jeral rekrutamentu ba membru foun tinan nee tenke konfortavel no transparensia ba sidadaun hotu-hotu.
“Ita nia ekipa trabalhu aprezeta ona, depois mak Ministeriu Interior sei haree fila-fali kona-ba kriteriu sira neebe Komando aprezenta ona nee sira haree loos ona ka seidauk, karik seidauk loos entaun persiza hadia tan, maibe loos ona ita avansa ba oin,” nia dekkara.
Nia esplika, Komando persiza iha duni rekrutamentu atu nunee iha membru PNTL foun para bele halo servisu ba nasaun no povu ida ho diak liu tan.
Entretantu Governu liu husi reuniaun Konselhu Ministru, Kuarta (05/02/2025), aprova projetu Rezolusaun Governu nian, neebe aprezenta husi Ministru Interior, Francisco da Costa Guterres, nesesidade rekrutamentu iha tinan 2025 ba Polísia Nasionál Timor Leste (PNTL) no autorizasaun ba abertura konkursu publiku ba admisaun iha Kursu Formasaun Ajente no Kursu Formasaun Ofisiál.
Tuir komunikadu neebe STL asesu husi Gabinete Ministru Prezidensia Konselhu Ministru esplika, medida ida nee ho objetivu atu reforsa pesoal PNTL, hodi garante kapasidade operasional neebe boot liu no prezensa polísia neebe efisiente liu iha teritoriu nasional tomak. Rekrutamentu ba ajente no ofisial foun sira sei posivel atu rezolve defisit atual iha rekursus umanus, hadia nível patrulhamentu no vijilansia nian, atu nunee kontribui ba reforsu seguransa publika nian.
Nia objetivu mos atu promove renovasaun jerasional husi instituisaun, hodi asegura kontinuidade no modernizasaun estrutura polísia nian. Rekrutamentu ida nee mos ho objetivu atu reforsa reprezentasaun PNTL nian, atu nunee bele garante forsa polísia ida neebe reprezenta liu tan iha diversidade nasional, neebe fundamental atu estabelese relasaun konfiansa no proximidade ho komunidade oin-oin.
Entretantu total sei rekruta membru foun hamutuk nain 500, neebe 400 sei tama iha Kursu Formasaun Ajente no 100 iha Kursu Formasaun Ofisial.
(jen)
