DILI, STLTIMORLESTE.com – Responsavel husi eskola sira iha Munisípiu lima (5) partisipa ona formasaun kona-ba relatóriu ho gastus neebe mak iha, hodi responsabiliza merenda eskolar sira simu iha kada nivel munisipiu.
Xefe Departamentu Programa Merenda Eskolar iha ME, Belchior Maria Almeida Barros hatoo lia hirak nee ba STL iha nia knar fatin, Kuarta nee (01/07/2026).
“Hau hanoin formasaun ba responsavel ou direjente husi eskola sira, hau hanoin formasaun nee lao ona, hanesan iha Baucau, iha Munisipiu Lautem halo ona formasaun, maibe iha semana kotuk nee hotu ona, Covalima hotu ona, Aileu no Dili hotu ona, maibe Dili nian ohin hotu ona sei kontinua fali, kuaze munisipiu barak, nee duni barak mak ninia formasaun nee sei lao hela,” nia esplika.
Nia dehan, nee hein orsamentu, tanba depende ba iha munisípiu idak-idak, tanba tinan nee ME liu husi DNEIASE laiha orsamentu halo formasaun ba ida nee, maibe koordena nafatin ho sira iha munisípiu sira, tanba sira mak fornesedor hodi fo formasaun ba direjente sira iha nivel munisípiu.
“Formador nee mai husi MAE, MS liu husi ninia Diretor Servisu Saúde Munisípiu sira, nomos husi Responsavel Servisu Administrasaun Munisípal, neebe mak durante nee lao ona, formasaun neebe mak fo ba sira nee, oinsa mak sira bele halo jestaun ba merenda eskolar, oinsa mak sira atu haree konaba relatóriu ho gastus neebe mak iha, hodi responsabiliza merenda eskolar neebe mak sira simu iha kada nivel munisipiu,” nia deklara.
Nia hatutan, nunee sira bele ezekuta tuir regras manual neebe mak iha ona, neebe mak tau ona iha dekretu governu numeru 3, ida nee mak aprezenta relatóriu ba sira hodi bele fo formasaun.
“Ita nian formasaun nee halao ba direjente eskola sira hanesan koordenador husi nivel pre eskolar, koordenador filial, Diretor EBC no responsavel programa merenda eskolar nian iha munisípiu, Xefe departamentu, Diretor Edukasaun Munisípiu sira, formasaun nee halao husi Ministeriu Edukasaun, Ministeriu Saude no Ministériu Administrasaun Estatal (MAE),” tenik nia.
(jac)
