DILI, STLTIMORLESTE.com – Maske iha ona planu atu halo rezidénsia ba profesores sira iha tinan oin mai, maibé realizasaun projetu ne’e sei depende ba orsamentu.
Diretór Servisu Edukasaun Munisípiu Ainaro, Patricio da Costa Magno, hato’o informasaun ne’e ba STL liu husi telefone, Sesta nee (28/08/2026).
“Ita prepara atu halo rezidénsia ba sira, tanba tinan oin ita atu halo planu halo rezidénsia ba ita-nia professór sira. Agora ita hein hela orsamentu. Ita halo por etapa deit, tanba depende ba ita-nia orsamentu,” katak nia.
Tuir nia, to’o agora profesores sira seidauk iha rezidénsia própria, nune’e balun tenke aluga uma komunidade nian, no balun hetan fatin hela ne’ebé komunidade sira fó ba sira.
Nia hateten, situasaun ne’e liu-liu akontese ba bolsista kandidatu profesór sira, ne’ebé presiza hela iha área besik eskola atu bele hala’o sira-nia knar hanorin.
“Desde husi ME koloka mai, ita-nia profesór sira seidauk iha rezidénsia. Entaun sira aluga deit komunidade nia uma, hodi bele hala’o sira-nia knar liu husi ensinu-aprendizajen ba ita-nia estudante sira,” nia haktuir.
Nia hatutan katak, kona-ba númeru bolsista kandidatu profesór sira ne’ebé hela iha kos no ne’ebé komunidade fó fatin hela ba sira, presiza halo identifikasaun no atualizasaun dadus atu bele hatene númeru loos.
“Ita-nia profesór sira hanorin iha eskola balun besik no balun lae, maibé la’ós distánsia dook liu. Ita-nia profesór sira kada loron hala’o knaar ho diak, lao tuir oráriu ne’ebé iha ona, tuir oras hanorin,” nia afirma.
(jac)
