DILI, STLTIMORLESTE.com – Metodu hanorin iha aula, daudaun nee fo hela formasaun ba profesores sira, tanba sai profesor nee hanesan vokasaun ida.
Haktuir Prezidente INFORDEPE, Domingos Martins ba jornalista sira ih sala Ian Martin Balide, Tersa (11/02/2025).
“Metodu hanorin iha aula, ita rekonhese katak, profesores sira barak mos laos nian antesedente nee atu lisensiatura iha area edukasaun, ho nunee mak ita nafatin fo hela formasaun kontinua ida ba sira, aleinde ida nee sai profesor hanesan vokasaun, ho nunee profesor ida neebe mak atu hanorin atrativu no moderniza tenke prepara didiak, buat neebe mak governu fo, liu-liu ligadu ho formasaun, ita rekonhese limitadu los,” tenik nia.
Domingos dehan, sai manorin ida neebe mak profisional atu investe ninia matenek nomos transmiti ba ninia estudante sira tenke preparasaun aula nee importante atu hanorin, ho nunee metodu neebe mak atrativu nee mak importante.
“Dala barak ita nian profesor sira mos sempre kestiona formasaun ba ensinu aprendizajen, liu-liu atuasaun sala de aula, iha parte balu ita fo hela formasaun ba kontiudu kurikular no metodu ensinu, maibe iha boa vontade profesor nee rasik mos importante, nee duni atu rezumu deit katak, atu sai profesor neebe diak tenke mai husi inisiativa ida,” nia dehan.
Nunee mos Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos hatete, ho planu estratejiku sira nee bele haree mos metodu sira nee, karik durante nee ninia sistema ruma ladun diak iha formasaun, nee karater halo mudansa karik liu-liu ba iha jestaun sira.
(jac)
