DILI, STLTIMORLESTE.com – Ministra Edukasaun (ME), Dulce de Jesus Soares hatete, eis profesores kontratu 2023 la partisipa iha teste espesial, nee sira nian direitu, labele obriga, tanba atu sai profesor iha nasaun ida nee, dalan ida mak bele tuir teste.
ME Dulce dehan, la partisipa iha teste, nee sira nian direitu, importante governu hatudu ninia responsabilidade katak, fo oportunidade ba sira, ema tuir ka la tuir labele obriga, enkoraja ema hotu atu tuir sistema neebe mak ME hatur tiha ona, mak atu sai profesor iha nasaun ida nee dalan ida mak bele tuir teste.
“Rekrutamentu nee mos laos prosesu ida fasil, primeiru ita tenke halo quadro pesoal, iha tinan liu ba ita konsentra ba quadro pesoal ba ensinu baziku ho pre eskolar, iha tinan ida nee ita mos haree ba ensinu sekundariu no tekvo, ita hein katak ho ita boot sira nian apoiu iha trimestre ida nee plemenus ita bele halo ona rekrutamentu ba ensinu sekundariu jeral no tekvo neebe mak liu husi teste espesial ba ita nian maluk sira neebe mak kontratu iha 2023,” haktuir Ministra Edukasaun (ME), Dulce de Jesus Soares ba jornalista sira iha salaun Ian Martin, Balide, Segunda (17/02/2025).
Nia hatutan, se mak atu sai profesor, iha IX Governu Konstitusional hatur katak, teste mak sei lori ema sai profesor, halo teste nee atu haree ema neebe mak pasa, hanesan iha jogu ida, iha balu manan no lakon, teste mos hanesan nee, sei halo teste espesial no teste komum loke ba ema hotu, se deit mak atu sai profesor bele tuir teste.
Iha fatin hanesan, Visi Primeiru Ministru, Ministru Koordenador Asuntu Sosiais, Ministru Dezenvolvimentu Rural Habitasaun Komunitaria, Mariano Assanami Sabino afirma, iha problema lubuk ida, tanba atu hadia duni no atu reforsa duni, maibe Ministra fo dalan ona, ida neebe mak kontratu ona no ida neebe hanorin kleur ona, fo ona dalan mak atu tuir teste espesial.
(jac)
