DILI, STLTIMORLESTE.com – Haree ba situasaun iha rai laran moris ho salariu U$ 150 labele uza ba iha fulan ida nia laran, tanba daudaun nee sasan folin hotu sae.
Tuir Trabalhador Jasinto Castro katak, haree ba situasaun iha rai laran sasan folin neebe husi loron ba loron folin sae hela deit, halo trabalhador sira neebe ho salariu US$ 150 mai kraik nee labele uza iha fulan ida nia laran hodi sustenta ba nesesidade familia nian.
Nia hatete, ho osan neebe naton nee, uza no gasta mos ba sasan neebe ho folin neebe kmaan nian deit, hanoin atu sosa buat neebe diak hanesan povu kiik nee dada iis tebes. Satan moris iha familia iha oan sira neebe eskola, uza ba sosa sira nia sasan no osan transporte ba mai lor-loron. Neebe osan nee labele uza too fulan, daal ruma latoo semana 2, buka impresta fali ema nian hodi uza fali.
“Ita haree povu iha nasaun nee maioria trabalhadores, ho osan US$ 150 seidauk bele hatan ba ami nia nesesidade moris lor-loron nian. Satan folin sasan iha rai laran, loron ba loron sae hela deit. Neebe ba hau, osan nee seidauk bele hatan ba trabalhador sira nia moris. Osan nee simu mai mos, dala ruma uza la too tan semana ida hotu ona, tenke buka impresta fali ema nian hodi uza no gasta fali ba nesesidade seluk neebe presiza nee,” dehan nia ba STL iha Audian, Segunda (06/07/2026).
Nia hatutan, tanba nee husu ba governu atu bele hanoin no hasae netik saalriu minimu nee ba trabalhadores sira neebe sei nafatin ho salariu US$ 150. Montante osan neebe iha nee kuandu kompara ho folin sasan iha rai laran, nee labele uza ba fulan ida nia laran. Husu mos ba Konfederasaun Sindikatu Timor Leste (KSTL), atu bele luta ba salariu minimu trabaladores iha nasaun nee nian.
Entertantu iha sorin seluk Prezidenti KSTL, Almeiro Vila hatete, dadaun nee KSTL forma ekipa konselhu nasional do trabalhu neebe kompostu husi Sekretariadu Sstadu Formasaun Professional no Emprego (SEFOPE), KSTL ho CCITL, liu husi inkontru hamutuk haruka ona esbosu dekretu lei salariu minimu bá MKAE nia fatin, no dadaun hein hela parte MKAE atu konvida reuniaun hodi halo konfirmasaun bá klarifikasaun atu hanoin hamutuk antes esbosu dekretu lei salariu minimu haruka bá konselu ministru atu bele hetan aprovasaun.
Nia dehan, tuir lei numeru 4/2012 proposta salariu minimu refere tenke hetan aprovasaun iha nivel konselhu ministru. Espera katak governu labele tarde tan atu prosesu lais proposta dekretu lei bá salariu minimu. Montante salariu minimu aprezenta ba MKAE ho US$ 160, ekipa konkorda iha reuniaun konsellu nasional do trabalhu no asina hamutuk akta no haruka bá MKAE.
“Ami nia hanoin mak avansa uluk ho proposta dekretu lei refere, atu nunee konsellu ministru bele foti desizaun iha tempu badak nia laran. Espera katak lei salariu minimu nee hetan ona aprovasaun, depois konselu nasional do trabalhu sei halo fila fali peskiza foun atu bele determina fila fali montante salariu minimu ba oin nian. Neebe tenke refere ba situasaun ekonomia trabalhador no nia familia sira,” dehan nia ba STL.
Nia hatete, agora dadaun nee bele konsidera katak, montante neebe mak deside nee la fo todan ba parte empregador. Espera katak buat hotu sei lao diak, ba oin haree fila salariu minimu neebe tuir duni nesesidade ekonomia familia nian. Atu nunee trabalhador nee simu bele sustenta nia familia iha fulan ida nia laran, neemak KSTL hakarak. Labele fali salariu minimu nee la balansu fali ho inflasaun neebe mak akontese iha rai laran. Labele salariu sae, maibe depois kontinua moris iha susar nia laran.
Nia haktuir, proposta ida dadaun propoin nee labele dehan, salariu nee justu duni ou salariu nee bele hatan duni ba nesesidade trabahador nian nian familia. Kuandu refere ba salariu neebe justu nee so ho montante US$ 200 ba leten ou 250, neemak foin bele dehan justu hodi hatan ba preokupasaun familia nian iha fulan ida nia laran. Neemak agora sei avansa hela ho proposta nee, depois mak halo fali peskiza foun.
Agora dadaun presiza governu nia komitmentu no responsabilidade moral atu haree katak problema salariu minimu nee hanesan preokupasaun ema hotu nian. Povu maioria nasaun nee ema trabalhadores, ema hotu atu hadia nia moris nee liu husi rendimentu neebe nia hetan.
(dom)
