BAUKAU, STLTIMORLESTE.com – Sarani Katolika iha Suku Tirilolo, Postu Administrativu Baukau Vila, simu ilhas Koronel Santo António hodi hametin fiar tuir mensajen maktoba Papa Francisco hameno.
Xefe Suku Tirilolo, Elvino Freitas Belo esplika, objetivu husi simu ilhas Koronel Santo António iha Suku Tirilolo, tanba tuir ajenda vizita ilhas Santo António tinan nee monu iha Suku Tirillolo neebe hahu husi loron 10 too 12 Junhu nee.
Vizita ilhas Santo António refere, Autoridade Suku Tirillolo espresa sentimentu kontente no orgulhu ba vizita ilhas Koronel Santo António nian, tanba liu husi vizita refere bele hametin fiar ba Uma Kreda Katolika nuudar kultura fiar nian tuir mensajen maktoban Papa Francisco nian ba sarani Katolika iha Timor Leste.
“Orgulhu primeiru tanba fiar, segundu ilhas Koronel Santo António nuudar mahein Baukau, nunee liu husi vizita nee bele aumenta fiar no tane aas nafatin ita nia igreja hanesan mos Amu Papa Francisco dehan, ita nia fiar mak ita nia kultura,” hateten Elvino ba jornalista sira iha Suku Tirilolo, Kuarta (11/06/2025).
Sarani Estanisilão Maria Quintas da Costa sente kontente, tanba vizita ilhas Koronel Santo António iha Suku Tirilolo nuudar momentu importante no marka istoria ba sarani sira husi Parokia rua, kompostu Parokia Sagrada Coração de Jesus Vila Nova no Parokia Santo António Vila Antiga.
“Nee momentu ida diak tebes atu halibur ami Aldeia neen iha Parokia rua nia laran neebe lori grasa mai ami, ami agradese,” Estanisilão espresa.
Padre Parokia Santo António Vila Antiga, Manuel Ximenes da Silva SDB hateten, vizita ilhas Santo António tuir tradisaun fiar sarani Katolika Postu Baukau Vila nian neebe kada tinan selebra aniversariu Santo António nian iha loron 13 Junhu, deside lori sai ilhas Santo António vizita sarani sira iha nivel Suku, maibe tinan ida ba Suku ida, tanba tuir orariu neebe deside, nunee tinan 2025 vizita sarani sira iha Suku Tirilolo.
“Objetivu vizita ida nee mak hametin fiar kristaun nian no haburas unidade entre sarani sira, ao mezmu tempu ba povu neebe pertense ba Suku Tirilolo,” hateten Padre Manuel.
Tuir Padre Paroku Santo António Vila Antiga nee katak, Suku Tirillolo iha Aldeia neen, tanba nee deside vizita ilhas Santo António iha Tirilolo durante loron rua tuir ajenda neebe komisaun organizadora prepara hodi sarani sira bele hasae orasaun no liu husi vizita ilhas Santo António hodi haraik bensaun ba sarani sira kria paz no estabilidade liu-liu haburas franternidade umana.
“Neebe ita hein Santo António milagriozu ida nee mai iha Tirilolo kria ambiente ida paz, amizade fraternidade entre ema sira no husi santo António nia vizita nia lori ita ba Jesus,” katak Padre Manuel.
Entretantu vizita ilhas Koronel Santo António iha Suku Tirilolo, loron dahuluk iha Aldeia Kaisidu, Parlamentu, Ossolia no Lealailesu hodi sarani sira hasae orasaun no daruak iha Aldeia Betulale no Lutumutu hafoin entrega hikas ba igreja iha loron 12 Junhu nee.
(tom)
