DILI, STLTIMORLESTE.com – Sarani Katoliku sira afirma sei la haluha sakrifisiu Amu Bispu nain tolu (3) nian, relasiona ho planu simu Restu Mortais Amu Bispu nain 3 ne’ebé sei to’o iha Dili, Tersa (01/09/2026).
Kestaun ne’e hato’o husi sarani no Katekista sira iha Tasi Tolu, Segunda (01/09/2026).
Sarani Jose da Silva hatete, nia senti kontente no emosionadu ho prezensa Restu Mortais refere.
“Hau senti kontente tebes no emosionadu. Ne’e bensaun boot ba ami sarani, tanba Amu Bispu nain tolu mak uluk luta makaas ba ami nia rain no ba Igreja,” dehan Jose.
Nia hatutan, kontribuisaun Amu Bispu nain tolu nian la haluha ba povu Timor-Leste.
“Ami sei la haluha sira nia sakrifisiu. Sira mak sai lian ba povu kiak no terus nain sira iha tempu okupasaun,” nia esplika.
Iha fatin hanesan, Katekista Manuel Sarmento hatete, prezensa Restu Mortais ne’e sei fo haksolok boot ba sarani hotu.
“Restu Mortais Amu Bispu nain tolu nian mai ne’e halo ami haksolok tebes. Sira mak aman matak ba Igreja no ba povu Timor-Leste,” dehan Manuel.
Tuir istoria, Amu Bispu nain tolu ne’e iha kontribuisaun boot ba Timor-Leste, laos deit iha vida fiar nian maibe mos iha luta ba direitu umanu no autodeterminasaun. Sira sai lian makaas defende povu iha tempu okupasaun, fo mahon ba ema terus nain sira, no lori Timor-Leste nia lian to iha mundu internasional. Sira nia dedikasaun halo Igreja Katolika sai fatuk inan ba povu nia esperansa.
Entretantu, Restu Mortais Amu Bispu nain tolu nian sei to iha Aeroportu Internasional Presidente Nicolau Lobato, Dili, Tersa (02/09/2026) meudia no sei lori kedas ba Katedral Dili hodi halo venerasaun publika.
(car)
