AMBENO, STLTIMORLESTE.com – Sekretariu Estadu Ensinu Sekundariu Jeral no Ensinu Sekundariu Tekniku Vokasional (SEESJ-ESTV), Domingos Lopes Lemos hamutuk Ekipa Nasional ho Diretor Rejional Servisu Edukasaun, Vincencio Cono, iha loron Segunda loraik entrega komputador 20 ho makina emprime ida ba Ensinu Sekundariu Tekniku Vokasional Palaban.
Serimonia entrega komputador sira nee realiza ho simu SEESJ-ESTV ho ninia komitiva ho bidu, tara tais no liafuan benvindu husi Diretor ESTV Palaban, Jose Antonio Oki no ofisialmente entrega komputador husi SEESJ-ESTV, Domingos Lopes Lemos ba DRE, Vincencio Cono, nunee kontinua entrega ba Diretor ESTV Palaban.
Tuir SEESJ-ESTV, Domingos Lopez Lemos liu husi ninia deskursu iha ESTV Palaban, Suku Costa, Postu Administrativu Pantemakassar Rejiaun Administrativa Espesial Oecusse-Ambeno (RAEOA), Segunda (06/07/2026) katak, ohin ekipa husi nasional mai iha ESTV Palaban, lori apoiu balun ba eskola ida nee.
“Ohin ami lori hela apoiu balun no entrega ba ita boot sira, atu apoiu imi estudante ho profesores sira, para atu modifika uitoan. Dadaun ita lori komputador ona iha nee, ho printer ida para iha materia multimedia, imi bele pratika iha aulas eskola laran, bele aprende,” dehan nia.
Nia dehan, kbiit husi Ministeriu Edukasaun maka nee, depois sei esforsu aan tan, tanba nee agradese ba estudante ho profesores sira hotu, tanba ESTV iha nivel nasional no teritoriu TL laran tomak, ESTV Palaban maka diak, estudante sira kada loron interese mai eskola hodi aprende no simu material husi professores sira.
“Hau hanoin, imi nia jestaun diak, estudante sira nia kompriensaun diak, no eskola iha ESTV nee, kuandu remata ona, sei halo buat saida mak durante nee estudu no iha matene, tanba nee parabens ba imi no parabens ba Oecusse,” dehan SEESJ-ESTV, Domingos Lopez Lemos.
Nia haktuir tan katak, apoiu ekipamentus komputador sira nee, sei apoiu ba Amo Agustinho iha ESTV Pasabe, atu nunee iha prosesu aprendiajen nee, estudante sira mos bele pratika komputador apoiu ekipamentus sira nee atu apoiu malu, fo hanoin ba malu atu estudante sira sai komunidade ida neebe maka iha edukativa atu bele eduka malu.
Nunee Diretor ESTV Palaban, Jose Antonio Oki, Agradese ba Ministeriu Edukasaun (ME) liu husi SEESJ-ESTV ho komitiba, entrega ona apoiu komputador unidade 20 ho makina emprime unidade 1 ba ESTV Palaban.
“Ami sente orgulhu tanba apoiu teb-tebes, tanba durante nee estudante barak iha ESTV Palaban kuaze 1005, maibe ami nia komputador iha nee 20 deit, tanba nee susar uitoan atu fahe materia ba estudante sira hotu-hotu, tanba nee ohin governu apoiu tan komputador 20, hau hanoin ida nee sufisiente ona. Iha nee professor hamutuk 41,” dehan nia.
Iha biban nee Diretor ESTV Palaban, iha esperansa boot tebes ho apoiu komputador sira nee, atu hadia kualidade ensino, liu-liu kapasidade estudante iha ICT, tanba dadaun tama ona iha siklu 21, entaun presiza duni sasan eletroniku, liu-liu informatiku ninian, komputadores presiza teb-tebes.
“Hau hanoin, ho apoiu komputador sira nee, lori edukasaun tama ba Dijitalizasaun ka mundu modernu nian, tanba nee laboratoriu prepara ona, iha faze instalasaun, tanba nee orsidada lokraik ami monta kedas komputador sira nee, atu aban iha prosesu aulas, bele uza ona ekipamentus sira nee, tanba iha nee profesores ICT hamutuk nain 5,” haktuir nia.
Tuir observasaun STL iha ESTV Palaban, professor no estudante sira kontente simu SEESJ-ESTV, Domingos Lopez Lemos ho ekipa ho kontente, tanba governu oferese tan apoiu komputador ba sira hodi pratika iha eskola.
(jos)
