Seidauk Hatama Relatóriu Konsesaun Eskolár ba ME

Foto Ilustrasaun

DILI, STLTIMORLESTE.com – Eskola Sekundária Jerál (ESJ) 10 de Dezembro, Comoro, seidauk hatama relatóriu kona-ba ezekusaun Konsesaun Eskolár ba Ministériu Edukasaun (ME), tanba prosesu ezekusaun osan ne’e sei kontinua to’o remata ezame finál tinan letivu nian.

Diretór ESJ 10 de Dezembro, Manuel Verdial informa, ida-ne’e ba STL, iha kinta-feira (19/11/2026), iha Dili.

Verdial esplika katak, Konsesaun Eskolár ne’e eskola simu iha fulan Setembru liubá, no osan ne’e uza bazeia ba nesesidade eskola, inklui apoiu ba ezekusaun ezame nasionál no atividade sira seluk.

“Hau hanoin kona-ba Konsesaun Eskolár ne’e, ita simu ona iha fulan Setembru liubá. Iha momentu ne’e, ita uza osan ne’e ba ezekusaun ezame nasionál. Relatóriu ne’e ita konta husi trimestre daruak no datoluk, to’o iha realizasaun finál ezame no pasajen klase ba estudante sira. Tanba ne’e mak ita foin hatama relatóriu ba ME,” nia afirma.

Nia hatutan katak, to’o agora eskola seidauk hatama relatóriu tanba hein atu remata uluk ezame iha períodu III. Depois de prosesu ezame remata, mak eskola sei prepara no hatama relatóriu ezekusaun osan ba Ministériu Edukasaun.

Nia mós hateten katak, osan Konsesaun Eskolár la uza de’it ba ezame, maibé mós ba nesesidade seluk, hanesan hadi’a infraestrutura bázika iha eskola. Utilizasaun osan hirak-ne’e sei inklui iha relatóriu ne’ebé sei submete ba ministériu.

“Tuir ami-nia estudante sira, total hamutuk 17.000. Tanba ne’e, ezekusaun osan ne’e bazeia ba total estudante no nesesidade eskola, tantu ba ezame nune’e mós ba asuntu infraestrutura,” nia esplika.

(jac)

Share it :

Leave a Reply

Your email address will not be published. Required fields are marked *