DILI, STLTIMORLESTE.com – Servisu Edukasaun Munisipiu (SEM) Liquiça too agora seidauk simu preokupasaun husi bolsa kandidatu profesores konaba sira nian rezidensia no salariu kada fulan.
Lia hirak nee hatoo husi Diretor Servisu Edukasaun Munisipiu Liquiça, Julio da Silva ba STL liu husi telefone, Kinta nee (23/07/2026).
“Konaba implementasaun programa merenda eskolar lao diak hela, ita tama ba iha periodu ikus nee iha. Ita nian bolsa kandidatu hela fatin iha, hodi bele halao sira nian servisu lao normal hanesan baibain, depois sira nian salariu mos lao normal hela, konaba alojamentu nee sira mak hatene katak, alojamentu nee lao hela ou lae,” nia dehan.
Julio dehan, bainhira bolsa kandidatu profesores la hatoo buat ruma mai SEM Liquiça, nee signifika katak buat sira nee lao, nee duni bolsa kandidatu sira la hatoo preokupasaun ba sira, tanba nee profesores sira nian salariu kada fulan lao diak.
“Ita nian bolsa kandidatu sira iha eskola halao sira nian knaar tuir orariu neebe estabelese ona husi eskola ida-idak, nunee mos halo planu de aula, tanba nee too ohin loron bolsa kandidatu sira nee seidauk mai hatoo preokupasaun ruma, liga asuntu neebe mensiona,” nia esplika.
Iha parte ketak, Diretor Servisu Eduksaun Munisipiu Ainaro, Patricio da Costa Magno dehan, profesores nain 10 resin neebe mak durante nee hanorin iha nivel ensinu baziku iha Munisípiu Ainaro, foin daudaun nee sira nian salariu tama tarde iha fulan Maiu ninia, nee duni sira nian rezolve ona.
“Ita nian profesor sira nee balun aluga ema nian uma no balun mak kontinua hela iha komunidade sira nian uma. Durante nee profesores sira nian salariu tama diak hela, foin daudaun nee mak sira nian salariu la tama no sira nian ba rezolve ona, maibe agora balun nian tama ona no balun nian mak sei hein, tanba sira nian konta bankaria nee mak iha rua ka tolu, sira ba rezolve rasik iha Rekursu Umanu Nasional ME, nee duni balun agora foti ona sira nian salariu,” nia dehan.
(jac)
