DILI, STLTIMORLESTE.com – Iha semana nee Prezidente Republika (PR) Jose Ramos Horta sei fo pose ba Antonio Kalohan, hodi asumi knaar nuudar Embaixador Timor Leste ba Zenebra.
Prezidente Republika Jose Ramos Horta hatoo lia hirak nee ba jornalista sira iha Kantina Matak Palasiu Prezidensial Nicolao Lobato, Bairo Pite, Tersa nee (11/02/2025).
PR hatete, lo-loos fo ona pose, maibe kondisaun la permite, tanba nee Prezidente kansela sei fo pose iha loron Kuarta ka Kinta semana nee nia laran.
“Hau mak husu fo pose ba Embaixador Zenebra muda, tanba hau moras hela. Atu simu pose loron Kuarta no Kinta hau mak araska, entaun hau husu deskulpa. Entaun aban ka bainrua mak pose ba Antonino da Conceição nuudar Embaixador ba Zenebra, ba nasaun unidas no ba Suisa,” katak Prezidente Republika.
Prezidente Republika mos komunika ona ho Embaixador Suisa iha Jakarta katak, bainhira buat hotu los ona Antonio Kalohan bele aranka ona hodi halao nia knaar iha fatin.
“Hau rasik koalia ho Embaixador Suisa iha Jakarta, no nia mak mai iha nee semana kotuk liu ba, antes hau ba Abu Dhabi nia mai, hau koalia ho nia buat hotu-hotu prontu, nunee Embaixador bele aranka,” katak PR Horta.
Xefe Estadu dehan, sei fo pose ba Embaixador António da Conceição, maibe falta Embaixador balu, hanesan Angola tenke nomeia lalais Embaixador Angola, tenke nomeia Embaixador foun ba Portugal, ba Japaun, Bruxelas, purtantu sidade barak neebe seidauk iha Embaixador foun nee urjente.
(eme)
