DILI, STLTIMORLESTE.com – Servisu Imigrasaun rejista estranjeiru 75 hosi Xina no 55 hosi Indonézia ne’ebé hetan ordem tribunál atu labele sai.
Tuir Diretór Ezekutivu Servisu Migrasaun, Komisáriu Asistente Polísia Jorge Monteiro, autoridade hala’o fiskalizasaun rigorozu ba estranjeiru sira-ne’e.
“Ita ejista estranjeiru 75 husi Xina no 55 hosi Indonézia ne’ebé hetan ordem tribunál atu labele sai,”hatete Diretór Ezekutivu Servisu Migrasaun, Komisáriu Asistente Polísia Jorge Monteiro ba jornalista sira iha Ministeriu Interior Caicoli, Tersa (22/09/2026).
Nia esplika, fiskalizasaun inklui monitorizasaun regulár iha fatin sira ne’ebé sira hela, atu garante kumprimentu ba ordem tribunál.
Diretur Servisu Imigraçaun hatete katak estranjeiru sira refere, tuir notifikasaun ne’ebé simu, to’o agora seidauk sai hosi Timor-Leste.
“Ita kontrolu mós hala’o iha pontu saída, inklui fronteira terrestre, aeroportu no portu marítimu, atu impede sira sai durante prosesu judisiál,” nia informa.
Medida ne’e aplika espesifikamente ba estranjeiru sira ne’ebé Servisu Imigraçaun simu notifikasaun ka ordem hosi tribunál.
Nia deklara, relasiona ho kazu burla informátika ka scam, autoridade sira seluk, inklui PNTL no Polícia Científica de Investigação Criminal, kontinua investigasaun.
Iha fatin ketak, Akademista UNTL José Costantino Ximenes hatete dadus Servisu Migrasaun hatudu movimentu estranjeiru boot entre Janeiru no Agostu 2026.
“ita hotu asesu iha media katak janeiru to’o Agostu 2026, estranjeiru 282.304 tama Timor-Leste hosi nasaun 198, no 288.624 sai fali,”nia informa.
Ximenes mós alerta katak númeru estranjeiru sira tama Timor-Leste aumenta, inklui sira ne’ebé bele halo atividade scam call center.
“Ita-nia nasaun ki’ik, maibé PNTL ho Servisu Migrasaun tenke kontrola tanba estranjeiru barak tama hodi hala’o atividade scam call center,”nia afirma
Tuir dadus ne’ebé STL asesu, Indonézia lidera entrada ho 82.193, tuir Xina 11.340, Austrália 7.312 no Portugál 6.236.
Filipina rejista entrada 1.682. Iha Agostu deit, estranjeiru 36.058 tama; Jullu 42.017 no Junu 40.302.
Durante períodu hanesan, Servisu Migrasaun emite dokumentu migratóriu 135.170 no rekuza entrada ba ema 82 tanba la kumpri rekezitu.
(jen)
