DILI, STLTIMORLESTE.com — Jurista Timor-oan konsidera planu atu estabelese Supremu Tribunal Justisa (STJ) nu’udar pasu pozitivu ida hodi kompleta hirarkia sistema tribunal no fortalece administrasaun justisa iha Timor-Leste.
Jurista Jose Maria Guterres hateten katak, estabelesimentu STJ importante tanba tribunal ne’e sei sai instánsia aas liu iha sistema judisiál, ne’ebé sei revê desizaun husi Tribunal Primeira Instánsia no Tribunal Rekursu.
“Mehi atu harii Supremu Tribunal Justisa ne’e buat ida pozitivu, tanba atu kompleta hirarkia tribunal nian,” dehan Jose ba STL iha Kaikoli, Sesta (28/08/2026).
Nia esplika katak, durante seidauk iha STJ, Tribunal Rekursu halao knar hanesan tribunal aas liu. Maibé, ho estabelesimentu STJ, tribunal ne’e sei sai instánsia final ba prosesu rekursu.
Subliña katak, Juiz Procurador no jurista ne’ebé sei servisu iha STJ tenke iha kualifikasaun aas no liu husi prosesu avaliasaun rigorozu. Tuir nia, sira tenke iha kapasidade atu interpreta lei, liuliu matéria direitu penal no sivil, no iha abilidade atu elabora desizaun no sentensa ho qualidade.
Iha sorin seluk, akademiku UNTL Sebastião Dos Santos konsidera katak tempu ona atu Timor-Leste estabelese STJ.
“Ita ukun-an kleur ona, presiza STJ atu bele lori justisa lao ba oin. Ohin loron Tribunal Rekursu maka hanesan tribunal ne’ebé aas liu, maibé kuandu iha STJ, nia maka sai tribunal aas liu,” dehan Sebastião.
Nia hatutan katak Timor Leste iha rekursu umanus barak, no rekrutamentu ne’ebé sei halao bele fó oportunidade ba Timor-oan sira ne’ebé iha kapasidade atu servisu iha STJ.
(ter)
