DILI, STLTIMORLESTE.com – Diretor Eskola Sekundariu Jeral nu. 4 Setembru Balide, Sergio A. da Cruz husu Media Suara Timor Lorosae ( STL) bainhira entrevista fontes, labele koa ema nia liafuan.
“Hanesan umanu ita ema la ses husi buat neebe mak sala, nee duni ita fo hanoin malu nee importante, entaun ho biban ida nee, nuudar sidadaun Timoroan fo hanoin ba malu dalan diak, bainhira atu fo sai notisia ligasaun ho fontes neebe mak ita boot sira entrevista, ita tenke analiza liafuan neebe iha nia vantajen, atu nunee labele mosu fali entendimentu entre parte tolu, parte ida mak ema nain nee rasik, segundu ba jornalista neebe halo notisia nee, dala ruma ema koalia ho liafuan neebe mak ladun diak, ezemplu ita entrevista karik analiza ema nia liafuan neebe mak fontes nee koalia,” afirma Sergio ba STL iha nia knaar fatin Balide, Kinta nee (30/01/2025).
Sergio dehan, bainhira jornalista sira atu halo entrevista, depois analiza fontes ninia liafuan nee merese atu publika ka lae, se lae ou sente ba nee la vantajen, entaun uza linguajen neebe diak husi ema nee, no karik entrevista ema bainhira fontes nee koalia labele koa fali liafuan neebe mak fontes nee koalia.
“Bainhira entrevista fontes nee ita labele koa fali liafuan neebe mak fontes nee koalia ona, tanba ema ida neebe ita ba entrevista nee, nia mos hakarak akompanha liafuan importante neebe mak nia koalia ona, ikus mai liafuan nee la sai, entaun nia la kontente, maibe ita ema la prefeitu, tanba nee ita fo hanoin malu nee importante,” nia esplika.
Nunee mos Joao do Carmo, hanesan juventude Suku Bairo Pite dehan, nuudar joven ida hakarak hatoo parabens ba Media STL, tanba liu husi media mak publiku bele asesu informasaun rai laran no rai liur, no husu jornalista sira foti notisia kona-ba lixu no problema bee moos iha fatin balu komunidade seidauk asesu no iha fatin balu komunidade laiha konsiensia soe lixu arbiru.
“Parabens ba Media STL, tanba Jornal STL halo aniversariu ba dala 32, husu publika notisia neebe los ba publiku. Nuudar joven ida hau hakarak hatoo parabens ba Media STL, tanba liu husi media mak publiku bele asesu informasaun tantu rai laran no rai liur, no husu jornalista sira foti notisia konaba lixu no problema bee mos iha fatin balu komunidade seidauk asesu bee no iha fatin balun komunidade laiha,” dehan nia.
(jac)