BAUCAU, STLTIMORLESTE.com – Servisu ba Rai no Propriedades Servisu Kadastrais (STPSC – sigla português) Munisipiu Baucau halo ona levantamentu rai estadu iha Suku Tirilolo no Bahu, Postu Administrativu Baucau Vila.
Diretor STPSC Munisipiu Baucau, Amon Bernardino da Costa Correia hateten, iha area juridiku Munisipiu Baucau rai estadu neebe barak liu iha Suku Tirilolo no Suku Bahu, Postu Baucau Vila, tanba nee iha inisiu tinan nee, STPSC Baucau liu husi tekniku hetan apoiu husi Autoridade Munisipal halo ona levantamentu rai iha Suku rua refere.
“Agora daudaun ita nafatin halo identifikasaun ba rai no uma estadu, iha parte Bugaiti nian kuaze atu final ona, planu atu kontinua ba DPR nian. Maior restu husi ida nee ita tama hotu ona,” hatete Diretor STPSC Baucau, Amon Bernardino da Costa Correia ba STL iha nia knaar fatin Tirilolo Baucau, Kinta (09/07/2026).
Nia esplika, prosesu levantamentu dadus rai estadu iha area Suku Bahu nian kuaze remata ona no daudaun ekipa kobre hela iha area Bugaiti, Vila Nova Baucau, no bainhira termina sei kontinua iha area Rumah Sangat Sederhana (RSS) Vila Nova Baucau, Uatulete no fatin seluk tan iha area urbana Baucau Vila neebe seidauk kobre.
Nia sublina, prosesu levantamentu dadus rai estadu nudaar pasu ida atu hatene totalidade rai estadu, tanba levantamentu dadus rai jeral neebe halao iha tinan hirak liu ba atual iha sistema taka.
“Levantamentu nee ita atu hatene katak, iha momentu ida nee ita la asesu dadus jeral entaun ita buka mekanizmu nee para rejista fila fali,” Amon akresenta.
Nia deklara, levantamentu antes nee seidauk klaru, tanba iha sistema dadus rai privadu no estadu kahur malu, tanba nee levantamentu dadus rai estadu atual nee bainhira remata sei enkaixa iha sistema ketak, nunee parte estadu bele hatene totalidade rai estadu husi nivel Aldeia too Munisipiu.
Nia komenta, husi insiu too ohin loron parte tekniku sira iha terenu halo levantamentu dadus rai estadu laiha impedimentu husi parte komunidade sira nain ba rai privadu neebe baliza ho rai estadu, maibe sira koopera, tanba servisu levantamentu importante ba interese dezenvolvimentu nasional.
“Levantamentu nee remata ita sei atribui ba instituisaun estadu nian kuandu iha ona planu atu konstrui edifisiu estadu,” Amon katak.
Diretor nee argumentu, lo-loos prosesu levantamentu dadus rai estadu iha Munisipiu Baucau liu-liu iha area urbana Baucau Vila, tuir tarjetu atu termina iha tinan 2026, maibe sei la konsege, tanba menus fasilidade servisu hanesan komputador, laiha transporte no rekursu umanu.
Nia sublina, problema refere relata ona ba Nasional atu apoiu fasilidade servisu hanesan komputador no apoiu tan pesoal dezenhu grafiku, maibe seidauk hetan resposta.
“Se ida nee mak sira fo duni fasilidade neebe ami presiza, hau fiar iha 2027 ita bele finaliza,” Amon hakotu.
(tom)
