DILI, STLTIMORLESTE.com – Parte ensinu superior sujere ba governu atu kria kondisaun loke kampu trabalhu, hodi bele absolve graduadus hirak neebe remata ninia estudu iha universidade.
Asuntu nee hatoo husi Reitor Instituto Ciência Saúde (ICS), Leao Borges ba STL iha nia knar fatin Balide, Sesta nee (24/07/2026).
“Menus empregu iha rai laran nee ita nian governu mak tenke kria kampu trabalhu ba graduadus hirak neebe remata ona sira nian estudu, nee mak ita sujere nafatin governu para bele kria kondisaun hodi bele absolve ita nian rekursu neebe mak ita produs, tanba ita haree dezempregu iha rai laran nee sei makaas tebes, tanba nee mak ita nian joven barak ba servisu deit iha rai liur,” nia informa.
Nia dehan, tanba realidade iha TL menus kampu trabalhu ba joven sira neebe remata ona estudu iha ensinu superior sira, joven barak sai ba servisu iha rai liur, nee duni joven neebe remata sira nian estudu nee sira barak agora ba servisu iha rai liur, tanba iha rai laran laiha servisu no laiha investimentu boot ruma hodi fo servisu ba joven.
“Los duni katak, ita nian rai nee servisu menus tebes, entaun hirak neebe kada tinan ita produs balun sai ba liur no balun too agora seidauk hetan servisu, nee mak husu governu oinsa atu kria servisu ba ita nian foin sae sira,” nia komenta.
Nunee mos Prezidente João Saldanha University ou Institute, Joao Mariano Saldanha hatete, tenke loke kampu servisu ba joven no graduadus sira neebe mak remata ona sira nian estudu iha universidade.
“Proplema estrutural neebe presiza rezolve liu husi estrutural katak tenke loke servisu ba ita nian graduadus sira, graduadus no universidade sira nian dever prepara graduadus sira nee prepara aan para bele kompete iha servisu, nee importante maibe tenke iha servisu ou kria servisu ba joven ho graduadus sira, universidade prepara deit ema hotu halao graduasaun, hau hanoin area ida neebe atu hetan servisu lalais nee mak hanesan area estudu sira nee, hanesan ami nian nee, laiha Timor laran nee, ami nian pendekataan nee inglês ho matematika, nunee sai ba bele kompete iha kampu trabalhu,” dehan nia.
Nia dehan, maibe importante liu tenke loke kampu servisu, hanesan kompanhia internasional, dezenvolve setor agrikultura, turizmu, hodi bele loke kampu servisu ba joven sira hodi kontribui dezenvolvimentu ba rai ida nee.
(jac)
