DILI, STLTIMORLESTE.com – Ema presiza tau prioridade aas ba Jesus Kristu, labele hanoin liu rikusoin mundu hodi haluha Maromak iha moris.
Lia hirak nee hatoo husi Padre Paul Kerans, SVD ba STL iha nia knaar fatin, Kuarta nee (01/07/2026).
Padre hatete, rikusoin mundu nian nee provizoriu deit, mate sei la lori, maibe buat neebe folin liu mak tau prioridade liu ba Maromak sai folin liu ba isin no klamar.
Padre dehan, iha evanjelhu Mateus 10:37-42 dezafia ema atu dixerni nia prioridade sira iha moris. “No fo hanoin mai ita katak tuir Kristu presiza empenu ho laran tomak. Sai dixípulu lo-loos laos sempre fasil, maibe ida nee lori ba moris ida ho objetivu ksolok no signifikadu rohan-laek,” dehan Padre Paul.
Padre dehan, iha evanjelhu mos hanorin ema oinsa tau aas Maromak liu sasan hotu, no husu atu hametin ema nia relasaun ho kristu.
“Evanjelhu hanorin katak ita nia relasaun ho Kristu tenke sai ita nia prioridade aas liu. Dukue Família, belun sira, servisu, no rikusoin mak importante, maibe ida labele troka Maromak nia fatin iha ita nia fuan. Bainhira ita tau Kristu uluk, relasaun sira seluk hotu sei hetan nia fatin neebe loos. Moris ida neebe sentra iha nia sai moris ida neebe orienta husi domin,” dehan Padre.
Padre dehan, tuir Jesus signifika hakuak sakrifísiu no dezafiu. Loron-loron ema iha oportunidade atu hili fidelidade duke konfortu, lia-loos duke popularidade, no servisu duke egoízmu. “Krus neebe ita lori bele subar husi ema seluk, maibe Maromak haree hahalok perseveransa hotu-hotu, difikuldade sira sai signifikativu bainhira hakuak ho konfiansa no domin,” dehan Pe.
Padre haktuir tan katak, hahalok diak iha valor ba moris, hahalok laran diak kiik hotu iha folin iha Maromak nia oin. Liafuan diak sira, liman ajuda nian, tilun neebe rona, Maromak la sukat prezente ida nia medida, maibe domin neebe akompana ida-nee, laiha hahalok diak ida neebe sinseru maka nunka lakon.
Maromak nunka haluha fidelidade. Sakrifísiu hotu-hotu, hahalok domin nian hotu-hotu, momentu servisu nian hotu-hotu, no opsaun hotu-hotu atu tuir Kristu iha folin boot iha Nai nia matan.
“Maski ita nia hakaas aan sira haree hanesan ema seluk la nota, maibe Maromak haree buat hotu nee. Fuan neebe laran moos kontinua atu serbí, fo, no hadomi hodi la buka rekonesimentu. Fidelidade iha buat kiik iha folin boot iha Maromak nia reinu. Kuandu ita laran metin nafatin hodi halo tuir Kristu, ita sente ksolok neebe klean, dame no satisfasaun. Moris neebe dedika ba Maromak nunka sai saugati deit, tanba Nia fo onra ba hahalok sinseru hotu neebe halo tanba domin,” dehan Pe Paul.
Bibi atan kreda katolika nee dehan, mensajen evanjelho ida nee fo hanoin ba ema atu tau uluk Kristu, simu sakrifísiu, pratika laran-diak, hanoin ema nia objetivu moris nian, no fiar iha Maromak nia promesa sira. Bainhira ema moris hanesan nee, sei deskobre katak rekompensa boot liu laos buat neebe ema simu husi Maromak, maibe ema nia lao loro-loron hamutuk ho Maromak.
Nunee mos joven ba Kristu, Onedia Soares hatutan nuudar joven nafatin buka atu halo tuir ukun fuan hanorin, dala barak monu ba sala tanba nuudar ema maksalak maibe koko hamriik hodi husu perdaun ba Maromak.
“Ohin loron dala ruma ita ema lao haluha aan hodi tau prioridade ba sasan mundu nia, dala ruma ita haluha Maromak, maibe ita konsiente katak buat neebe ita buka no ita hetan grasa mai husi Maromak, maibe hanesan ema maksalak la ses husi sala bainhira lao sala koko hakbesik aan ba Maromak hodi husu perdua fali,” katak nia.
Nia hatutan, loron seluk ita halao ita nia atividade maibe keta haluha iha moris, ezemplu bainhira sai husi uma buat simples neebe halo mak hodi sinal kruz, husu Jesus nia prezensa akompanha, no karik hasoru dezafiu iha moris koko hakbesik aan ba Maromak, no iha Domingo hakbesik aan ba igreza hodi rona nain nia liafuan sira no simu Kristu nia isin.
Nunee mos Padre Richardo Pasang, SVD hatete, Maromak mak hun no rohan ba buat hotu, tanba nee bainhira hasoru dezafiu mak buat oin-oin iha moris nafatin tau komfiansa iha Kristu sei fo solusaun neebe mak diak iha ema nia moris.
Padre hatutan, husu ema hotu hotu nafatin tau Maroma kaas liu sasan hotu mundu nia, tanba buat hotu neebe ema hetan nee grasa mai husi Maromak, tanba nee keta haluha hahi no hanain Maromak iha moris loron ba loron.
(eme)
