DILI, STLTIMORLESTE.com – Eis Primeiru Ministru no Eis Prezidente Republika, Taur Matan Ruak liu husi pajina ofisial Facebook nian, espresa sentimentu triste klean no hatoo sentidu kondelensia klean ba falesimentu Padre João Felgueiras, SJ, neebe hakotu ninia peregrinasaun iha mundu, iha Díli Medical Center, Bairru dos Grilhos, Díli.
Iha komunikadu neebe publika iha pajina ofisial nee, Taur Matan Ruak konsidera katak rai Timor Leste lakon tan figura boot ida, neebe dedika nia vida tomak ba Kreda no mundu edukasaun nian.
“Timor Leste liu-liu uma Kreda Katoliku lakon tan figura ida neebe nia vida tomak dedika aan ba uma Kreda no edukasaun Timor Leste, Padre João Felgueiras. Harohan atu Aman Maromak simu nia iha kadunan santu,” hakerek iha pajina ofisial Facebook nee.
Eis Xefe Governu nee fo rekonhesimentu aas dedikasaun no sakrifisiu hotu neebe Misionariu Jesuita nee hatudu ona, liu-liu durante tinan naruk neebe nia servi sarani (povu) no rai Timor Leste, tantu iha tempu susar funu laran nunee mos iha tempu ukun aan.
Padre João Felgueiras neebe mai husi Portugal no hela iha Timor-Leste husi tinan 1971, hakotu iis ka husik hela mundu nee ho idade 105. Aleinde hatoo sentidu triste, deklarasaun hatoo orasaun no solidariedade ba familia, belun no mos kongregasaun neebe lakon mestre no aman espiritual estimadu ida.
Iha parte ketak nuudar sarani Katolika, Antônio da Silva mos espresa ninia laran triste klean no fo rekonhesimentu ba Padre João (matebian) nia kontribuisaun.
“Padre João Felgueiras nuudar naroman no ezemplu moris neebe boot ba sarani hotu iha Timor Leste. Ninia laran luak no dedikasaun tomak ba moris espiritual, no edukasaun ba jerasaun foun sira nian sei moris nafatin iha ami nia memoria,” hatoo husi sarani Antônio.
(car)
