DILI, STLTIMORLESTE.com – Iha Domingu II tempu adventu nian fo hanoin ba sarani katak, tempu adventu halo karidade fo tulun ba ema neebe presiza tulun, fahe ai-haan ba sira neebe laiha ai-haan.
Iha omilia Padre Paulus Maya hatete, ohin tama ona ba Domingu II tempu adventu nian, signifika besik daudaun ona ita nia maksoin nia loron festa Natal, katak loron neebe maksoin moris, tanba nee iha Domingu II tempu adventu nian, bolu ema hotu no fo hanoin ba ema saida mak halo ona hodi hein maksoin.
Los duni tempu Adventu nee tempu atu hafoun liafuan no haklaken lia foun, saida mak lia foun mak liafuan dame, perdaun, konsolasaun motivasaun, enkorajementu, metin unifika no haforsa, laos kaer metin liafuan tuan neebe defaktu liafuan sira nee estraga sobu kuda sentimentu odiu, hakanek, halo triste, hamosu funu no liafuan sira neebe la fo valor.
Hadia Nai nia dalan nee mak lia neebe hakilar iha rai fuik maran, lia nee mak lia tempu adventu nian, lia neebe bolu no konvida ema atu hadia no hafoun, lia neebe atu husu ema hatete no halos no lia neebe bolu ema atu prepara aan ba Nai neebe sei mai, lia neebe hakribi sala, moris mak dalan neebe lori ema ba Maromak no lori Maromak ba ema nia moris.
Pe. Palulos hatete, wainhira moris tuir lo-loos obrigasaun hanesan ema sarani neebe los no diak, laiha duvida tan moris nee mak lori ema ba Maromak no Maromak besik liu tan ba ema.
“Tempu adventu, tempu adventu de karidade, halo karidade la presiza buat neebe boot, basta atensaun ba ema neebe presiza ita nia atensaun, vizita ema moras, fahe hahan ba ema sira neebe laiha ai-haan, tulun ema neebe presiza, reza ba ema, hamate ita nia aan husi kaan no gostu husi loron nian, ida nee mak hahalok konkretu Adventu nia presiza ita halo, atu tulun ita prepara ita nia aan hodi simu ita nia maksoin,” hatete Pe. Paulos Maya liu husi omilia wainhira prezide misa iha Katedral Dili, Domingu nee (08/12/2024).
Tanba nee, tempu adventu tempu atu hein, dala ruma hein buat neebe labele haree ho matan halo ema bosan, maibe Santu Ansaun dehan, wainhira iha tempu hein neebe labele haree ho matan presiza hein ho pasiensia, presiza halo orasaun, kontinua halo diak, kontinua hadia aan liu husi konversaun ka hakribi sala too Nai mai, ida nee rekomendasaun husi leitura sira neebe rona ona nee.
(joa)
