DILI, STLTIMORLESTE.com – Tempu badak Timor Leste (TL) sei hetan sertifikadu ba livre husi moras malaria.
Kestaun nee haktuir husi Reprezentante World Health Organization (WHO) iha Timor Leste, Arvind Mathur ba jornalista sira, bainhira remata halo enkontru ho Prezidente Republika, Jose Ramos Horta iha Palasiu Prezidensial Nikolao Lobato, Bairo Pite, Kinta (16/01/2025).
Reprezentante WHO nee dehan, Timor Leste presiza prienxe rekejitu balu neebe mak iha, nunee tempu badak bele hetan sertifikadu kona-ba livre husi moras malaria.
“Kona-ba progresu eliminasaun moras malaria, ita hakarak hatete, nee prosesu global ida neebe iha pasu no etapa, no rekejitu sira neebe ita presiza prienxe, maibe ita besik tebes ona, no hakarak hatete mos katak nia prosesu daudaun nee halo hela revizaun husi ekipa peritus global ba asuntu ida nee nian, normalmente sira sei haruka sira nia misaun mai, depois mai se buat hotu los ona, prienxe rekejitu ita bele hetan eliminasaun ba malaria nia,” nia dehan.
Nia hatete, bainhira ekipa peritus global haruka misaun ma, se buat hotu los prienxe rekejitu Timor Leste bele hetan ona eliminasaun ba malaria, maibe karik iha fulan 6 tuir mai tan.
“Fulan 6 ba oin ita bele hetan sertifikadu malaria. Ho prosesu tomak neebe halo ona, entaun posibilidade tinan ida nee ita sei hetan ita nia sertifikadu,” katak nia.
Nia hatutan, TL sei sai uma nain ba enkontru boot ida, enkontru internasional teknikal nian ba rejiaun sudeste Aziatiku haree ba asuntu mudansa klimatika neebe mak sei halao iha 24-28 fulan Febreiru tinan nee.
(eme)