DILI, STLTIMORLESTE.com – Iha tempu lansamentu populasaun Ermera ho membru Governu Munisipal no Nasional sira dahur too kosar atu simu projetu estrada ho esperansa katak sei lori mudansa, maibe rezultadu hatudu buat seluk, estrada neebe sai simbolu ba selebrasaun iha inisiu nee agora sai fali fatin perigu, tanba kondisaun dodok neebe halo Governu dukur hela nein foti kestaun.
Iha Timor Leste (TL) serimonia primeira pedra sai hanesan ritual sagradu. Bainhira Membru Governu ho kontratista sira hamriik hamutuk hodi foto povu senti esperansa, maibe bainhira festa remata realidade hatudu katak, dezenvolvimentu iha Ermera mak festa ba matan deit, maibe aat ba terrenu.
Dahur ho kosar been neebe Governu no populasaun Ermera hatudu iha loron lansamentu too agora sai hanesan teatru ida deit ba povu. Estudante no komunidade sira neebe uza estrada nee sente taridu. Tanba sa mak estrada neebe foin tau fatuk dahuluk ho serimonia boot sai oin seluk fali.
Nee laos kona-ba estrada neebe dodok, maibe kona-ba kualidade no fiar. Povu Ermera la presiza dahur no kosar been iha fatin serimonia, sira presiza estrada neebe metin, asesu neebe seguru ba sira nia produtu kafe no transpsransia kona-ba osan Estadu nian neebe gasta ba projetu sira nee. Bainhira estrada nafatin dodok nee hatudu katak, kosar been neebe fo sai iha lansamentu laos ba povu, maibe ba projetu neebe ho kualidade aat.
Tanba nee esperansa neebe la bosok mak lia fuan ikus povu Ermera hein husi Governu, laos koalia tan maibe servisu. Laos promete tan maibe entrega. Povu Ermera nia pasiensia limte no sira nia esperansa ba mudansa laos sasan neebe bele dodok hamutuk ho estrada sira nee.
Estudante Marcos Soares de Jesus husi Ermera, estuda iha Unidade balu iha Dili neebe akompanha besik situasaun ida nee, espresa nia laran todan boot ba kondisaun estrada neebe aat nafatin, maski lansamentu primeira pedra ba reabilitasaun estrada halo ona ho serimonia neebe solene, maibe benefisiu ba populasaun seidauk sente.
“Iha tempu lansamentu membru Governu sira dahur too kosar ba projetu nee, maibe agora projetu nee mos dodok hela la bok too agora,”dehan Marcos ba STL, iha Bairru Pite, Dili, Tersa (21/04/2026).
Tuir nia situasaun estrada neebe dodok nafatin laos deit impede mobilidade, maibe mos sai barreira boot ba ekonomia lokal, neebe depende ba produsaun kafe. Nia husu atu Governu laos deit fokus ba lansamentu projetu, maibe tenke garantia katak emprezariu sira halo obra tuir kualidade neebe tau ona iha kontratu.
Enkuantu iha loron 26 fulan Janeiru tinan 2026 Governu lansa projetu reabilitasaun urbana Glenu no ninia sistema drenajen ho orsamentu dolar Amerikanu milhaun US$ 32 resin iha durasaun neebe prevee ba tinan ida. Nunee mos mos husi Glenu too Postu Administrativa Letefoho ho 80 km resin, iha orsamentu dolar Amerikanu milhaun US$ 38 resin no prevee durasaun sei termina iha loron 365.
Liu husi diskursu Primeiru Ministru (PM), Kay Rala Xanana Gusmao apela ba populasaun Ermera liu liu iha area Glenu no Letefoho, atu labele kria obstaklu ba ezekusaun obra nee, nunee atu bele permite servisu nee lao tuir prazu neebe Governu define ona. Xefe Governu hatutan, estrada sira nee harii benefisiu diretu ba komunidade sira no kolaborasaun husi populasaun sira mak importante tebetebes atu projetu nee hotu lalais.
(car)
