DILI, STLTIMORLESTE.com – Prezidente Republika (PR), Jose Ramos Horta hatete, Xefe Polisia Sientifika Investigasaun Kriminal (PSIK) tenke foti prosesu displinar hasoru membru PSIK, ida neebe uza arma ameasa joven sira iha area delta.
Xefe Estadu hatoo kestaun nee ba jornalista sira bainhira remata halo enkontru ho ekipa hausi Multi Science Academy, iha Kantina Matak Palasiu Prezidensial, Nicolau Lobato, Bairo Pite, Dili, Tersa (11/02/2025).
Prezidente Republika dehan, kona-ba kazu neebe akontese iha Delta, membru PSIK uza arma ameasa joven sira, maibe ho asaun nee Xefe husi PSIK tenke foti prosesu displinar ba membru nee.
“Membru PSIK neebe uza arma ameasa joven sira hau foin mak rona ida nee. Se sira halo nee, se mak halo tenke foti prosesu disiplinar, instuituisaun seguransa iha neebe la tuir lei, regra governu tenke tau pulisaun disiplinar,” katak Prezidente Republika.
Nia dehan, bainhira elementu ruma husi PNTL, PSIK ka F-FDTL mak hatudu komportamentu ladiak impaktu ba naran instituisaun nomos Estadu, tanba nee presiza halo prosesu displinar ba membru neebe kontra lei no ordem neebe eziste iha rai laran.
“Tanba sira tenke hatene ida nee, bainhira elementu ruma, PNTL, PSIK ka F-FDTL, ka sese komportamentu la diak nee impaktu aat ba naran instuituisaun nian, no naran rai nian. Nee duni hau espera Xefe PSIK sei halo prosesu disiplinar kontra elementu, tanba sa nia lori fali kilat, nee laos nia mandatu, nee foin mak hau rona,” katak PR Horta.
Membru PSIK neebe uza arma ameasa joven sira neebe akontese iha Delta iha loron Segunda (10/02/2025).
Iha biban nee Prezidente Republika José Ramos Horta hatete, nia mandatu hela tinan rua deit, tanba tinan ikus la konta ona, tanba nee ba Prezidente foun mai povu mak sei hili.
“Fulan Maiu mai nee hau kompleta ona mandatu tinan tolu, falta deit tinan rua, maibe bainhira tinan ikus liu nee 2027 nian nee lalika konta ona. Bainhira ita too Maiu 2026 nee tinan ida, depois ba oin nee aselera liu tan ona,” katak PR Horta.
Xefe Estadu hatete, futuru se mak asumi kargu nuudar Prezidente Republika, nia la hatene nee partidu polítiku, sosiedade sivil sira mak sei haree.
No importante mos eleisaun parlamentar 2028, ba atual Governu falta deit tinan tolu ho balun, tanba tinan ida ho balun hahu iha Julhu 2023, agora too Julhu 2025 tinan rua, purtantu falta deit tinan tolu. Tanba nee ba oin jerasaun foun nee se loos nia la hatene.
(eme)
