Timor-Leste, KOICA no WFP Lansa Projetu US$ 7.2 Miliaun

Foto: Espesial

DÍLI, STLTIMORLESTE.com – Governu Timor-Leste liuhosi kolaborasaun ho Korea International Cooperation Agency (KOICA) no Programa Ai-han Mundiál (WFP), lansa projetu Haforsa Seguransa Ai-han no Nutrisaun iha Timor-Leste (SNFS).

Projetu ne’e sei implementa durante tinan lima, husi 2026 to’o 2030, ho finansiamentu Governu Repúblika Koreia hamutuk US$ 7.2 miliaun.

Inisiativa ne’e sei benefisia ema hamutuk 86,675, inklui estudante 85,049 husi eskola ensinu báziku 498, parseiru eskolár 1,156 no agrikultór lokál 470.

Liu husi komunikadu imprensa neebe STL simu husi media WFP Tersa (17/11/2026), Embaixadór Repúblika Koreia ba Timor-Leste, CHANG Ha Yeon, dehan kooperasaun ne’e sei kontinua hametin asesu labarik sira ba hahán nutritivu no kria oportunidade merkadu ba agrikultór lokál.

“Repúblika Koreia kontente atu kontinua hametin kooperasaun ho Timor-Leste liuhosi KOICA no WFP,” afirma CHANG Ha Yeon.

Projetu SNFS sei estende kobertura programa merenda eskolár ba Munisípiu Viqueque, hodi aumenta asesu ba hahán nutritivu iha eskola sira.

Diretora no Reprezentante WFP iha Timor-Leste, Jacqueline de Groot, hateten katak faze daruak ne’e bazeia ba rezultadu pozitivu husi projetu Say No to 5S (SN5S).

Inisiativa ne’e sei foka ba hadi’a infraestrutura merenda eskolár, promove foos fortifikadu no hametin ligasaun entre eskola ho agrikultór lokál.

Projetu ne’e mós sei suporta konstrusaun dapur no refetóriu foun 30 iha eskola sira, inklui fornese ekipamentu importante atu hadi’a preparasaun no kualidade hahán.

Ministra Edukasaun, Dulce de Jesus Soares subliña katak, nutrisaun di’ak importante ba saúde, kresimentu no aprendizajen estudante sira.

“Ai-han nutritivu suporta saúde, kresimentu, dezenvolvimentu no aprendizajen labarik sira nian,” dehan Ministra Dulce.

Iha área agrikultura, projetu ne’e sei fasilita akordu aprovizionamentu entre eskola, grupu agrikultór no kooperativa sira.

Mekanizmu ne’e sei kria merkadu sustentavel ba produtu lokál, hodi ajuda agrikultór ki’ik 470 no garante eskola sira hetan hahán fresku no diversifikadu.

Aleinde ne’e, projetu sei organiza formasaun ba profesór, koziñeira no funsionáriu governu sira atu hadi’a jestaun merenda eskolár.

Edukasaun nutrisaun iha eskola mós sei promove hahán saudavel no hadi’a koñesimentu estudante sira kona-ba dieta ekilibrada.

Vise-Ministru Administrasaun Estatál, Jacinto Rigoberto Gomes de Deus, konsidera koordenasaun entre instituisaun nasionál, munisípiu no eskola importante ba susesu programa ne’e.

“Projetu ida-ne’e oferese oportunidade atu hadi’a maneira programa ne’e jere no monitoriza,” afirma Jacinto Rigoberto.

Serimónia lansamentu realiza iha Hotel Timor, Dili, no kontinua ho enkontru dahuluk Komité Diretivu Projetu nian.

Enkontru ne’e estabelese mekanizmu jestaun no supervizaun, hodi garante implementasaun efetiva no hametin kooperasaun entre parseiru sira.

(dom)

Share it :

Leave a Reply

Your email address will not be published. Required fields are marked *