DILI, STLTIMORLESTE.com – Ajensia ho naran ZitayAmora durante eziste iha Timor Leste neebe hetan lisensa husi Servisu Verifikasaun Emprezarial, Institutu Publiku (SERVE.I.P) atu halao funsaun faan bilhete aviaun Citilink, loke diler karreta no motor, fornese ai-haan ba iha instituisaun neebe persiza. Enkuantu atividade fasilita trata vistu trabalhu ba Timoroan atu ba servisu iha Portgál nee ilegál.
Portavós Julião de Sousa liu husi konferensia imprensia hatete, ajensia ZitayAmora, Edmundo Soares Martins durante nee bosok Timor-oan hodi trata vistu trabalhu no ajensia promete ba Timoroan sira katak, fulan tolu too haat bele hetan ona vistu trabalhu no bele ona ba servisu iha Portugal.
“Osan hirak neebe ajènsia haruka ami hatama ema ida US$ 3500 no balun fo tiha osan sorin ho montante US$ 1750, ho objetivu atu fasilita ami nia vistu trabalhu hodi ba servisu iha Portugal, maibe ikus mai mosu problema iha ajensia ZitayAmora, nain ba ajensia obriga ami halo karta kanselamentu hodi ami bele foti fila ami nia osan neebe mak ami hatama ona, maibe ikus mai nain ba ajensia halai lakon, ami nia osan la devolve too ohin loron,” hatete Portavos Julião de Sousa ba jornalista sira liu husi konferensia imprensia, kuarta (08/07/2026).
Nia esplika, relasiona ho promessa faslu ajensia nian, ohin loron Timoroan kuaze 100 resin mak ohin loron sai vítima ba iha ajensia ZitayAmora.
“Ajensia ZitayAmora durante nee liu husi nia ajensia falsu hodi bosok ami trata vistu trabalhu ba servisu iha Portugal, entaun ami Timor-oan kada ema ida tenke hatama osan ba ajensia ho montante US$ 3.500 no balun fó metade ho montante US$ 1.375, ami Timor-oan besik 100 resin hatama osan kuaze liu milhaun US$ 1 ba iha Ajènsia ZitayAmora,” nia deklara.
Nia konta, sira hahu rejista naran ba iha ajènsia refere hodi hatama osan hahu husi loron 06/12/2025 too 2026, iha neebe ajènsia nee lokaliza iha Aldeia Osindo I, Postu Administrativu Dom Aleixo, Munisípiu Díli.
Nia haktuir tan katak, problema neebe vítima sira hasoru, primeiru nain ba ajensia ZitayAmora, Edmundo Soares Martins la responsabilidade ba iha vítima sira nia dokumentus, rua falsifika dokumentu, tolu kolega neebe ajènsia fasilita ho dokumentu falsu atu viajen ba Portugál maibe bainhira sira too iha Bali, Indonèzia, Imigrasaun deporta fila-fali, lima nain ba ajensia ZitayAmora halai lakon ona husi ninia ajensia no laiha kontaktu ho vítima sira.
“Bainhira ami too iha ajensia neeba nain halai lakon ona no ami ba halo karta kanselamentu maibe nain ba ajènsia refere mós nia prezensa laiha, maibe nia ameasa ami ho nia visa sira neebe iha hanesan Austrália no visa Portugál atu atrai ami mai iha ajènsia ida nee. Ho kazu ida nee ami vítima hatoo ba Timor-oan hotu atu labele monu ba ajensia ZitayAmora nia promesa,” nia informa.
Nia koalia, durante fulan 4 ona ajènsia laiha komunikasaun ho vítima sira, tanba nee vítima sira deklara katak nain ba ajensia refere nia uma vítima sira sei okupa hodi hein ninia resposta.
“Ami rekomenda ba PNTL, PSIK no Ministeriu Publiku, atu aselera lalais kazu neebe keixa ona relasiona ho aktu bosok husi ajensia atu labele halai sai husi Timor no nia tenke responsabilidade ba ami nia osan, ami ezije atu reembolsa fila fali ami nia osan,” nia afirma.
Tuir observasaun STL katak, ajensia ZitayAmora ninia fatin servisu fasilidade hanesan komputador, kaderia, meza rahun hotu monu ba rai inklui surat tahan sira soe lekar iha uma laran, enkuantu servisu fatin ajènsia nia didin ho kalen no odamatan lori aí kabelak ida mak taka netik. Too notisia nee hatun STL tenta koalia ho nain ba ajensia maibe nain laiha fatin.
(jen)
