Timoroan Buka Moris, Laos Buka Moras Iha Australia

Xefe Gabinete husi SEFOPE, Jacinto Ribeiro Dias. (Foto: STL/EST 2)

DILI, STLTIMORLESTE.com – Trabalhador Timoroan ba Australia atu buka moris, laos atu buka moras, tanba isin lo-loos ho ulun hafutar ona ho bandeira Republika Demokratika Timor-Leste (RDTL), katak jura no prontu servisu ho disiplina iha ema nia rain.

“Trabalhador Timoroan neebe ba servisu ona iha ema nia rain, no balu prepara aan daudaun atu ba servisu, husu atu servisu ho disiplina moris tuir regulamentu no lei neebe iha, displina tuir juramentu neebe iha nuudar Timoroan, tanba imi nia isin no ulun hafutar ona ho bandeira RDTL, ho promesa katak sei moris ho sistema, toba ho sistema, fila mai Timor Leste ho sistema, la sai husi sistema,” dehan Xefe Gabinete husi SEFOPE, Jacinto Ribeiro Dias liu husi nia diskursu iha salaun ETDA, Fatuhada Dili, Kinta (30/01/2025).

Nia dehan, trabalhador Timoroan hotu-hotu tau aan hanesan ema Timoroan, moris hanesan ema Timor too fila-fali mai hanesan ema Timor duni.

Tanba servisu iha ema nia rain atu buka moris laos buka moras, tanba husi imi nia disiplina sira mak hamorin nasaun Timor Leste nia naran iha ema nia nasaun, nunee ho responsabilidade nafatin nuudar Timoroan, lao hanesan Timoroan, para depois fila mai hanesan Timoroan, ida nee mak Estadu hameno.

Estadu Timor Leste husu mak trabalhador sira nia responsabilidade, disiplina, honestidade, tanba trabailador sira nia ulun no isin sira nee lulik atu labele lori, tanba hafutar ona ho bandeira RDTL, laos bandeira organizasaun no politika nian.

“Tanba ita ba serviau iha ema nia rain atu hadia ita nia rain liu husi dezenvolvimentu familia nian, oinsa bele kontribui fali ba Estadu Timor Leste, liu husi hadia imi nia uma laran, tanba ita nia situasaun laos tanba ita nia kondisaun,” nia afirma.

Nia dehan, importante mak trabalhador sira presiza servisu ho diak, moris ho promesa neebe iha, rai iha kakutak no fuan, katak ulun no isin ida nee hafutar ona ho bandeira RDTL, nunee tenke servisu oinsa bele hadia ekonomia familia no mos ba nasaun Timor Leste.

“Governu halo dezenvolvimentu ho maneira kria politika, mekanizmu jestaun iha koordenasaun ho nasaun sira neebe iha kapasidade, nunee trabalhador Timoroan ohin imi ba hanesan alunus, ba atu aprende iha ema nia rain, maibe tenke hanoin katak sei fila mai hanesan mestre ida,” hatete Jacinto.

Entretantu trabalhador Timoroan, Adão Msrio dos Santos hatete, oportunidade ida nee atu valoriza ho diak, tanba nee hanesan trabalhador prontu kumpri ba promesa sira neebe iha, katak moris ho sistema, labele sai husi sistema, kuandu la kumpri promesa sira nee mak sei kansela aspirasaun tomak.

Tanba ba servisu iha ema nia rain atu buka moris laos buka moras, nee hanesan mensajen importante ba Timoroan hotu iha Korea-sul, Australia, Japaun, no servisu tenke hatudu komportamentu neebe diak, hodi moris iha ema nia rain hanesan Timor oan duni.

“Ita kuandu servisu iha Australia laos atu manan osan deit, maibe aprende mos ema nia kultura, abitua ema nia ambiente, nunee fila mai bele diversifika fali iha ita nia rain rasik,” dehan nia.

Aleinde nee Xefe Departamentu Deslokasaun, Alarico Fernandes, enkoraja trabalhador Timoroan sira katak, servisu iha ema nia nasaun Australia atu manan osan no hetan esperiensia foun husi ema nia rain, nunee fila mai kria ekonomia família no tane ekonomia nasaun Timor Leste nian liu husi negosiu kiik sira.

“Familia trabalhador sira mos tau nafatin apoiu ba oan sira, fo suporta ba sira, servisu ho diak iha ema nia nasaun, tanba nee husi parte Governu mos husu ba inan aman ka familia sira atu kolabora ho Estadu ka Governu nasaun nee nian, hodi trabalhador sira la bele halai husi sistema no prejudika ba maluk Timoroan sira seluk neebe mak hein hela oportunidade neebe mai,” nia rekomenda.

(EST 1)

Share it :

Leave a Reply

Your email address will not be published. Required fields are marked *