DILI, STLTIMORLESTE.com – Komunidade ne’ebé hela iha Aldeia Likarapoma, Suku Bairo Pite, Postu Administrativu Dom Aleixo, Munisípiu Dili, kestiona tanba durante tinan barak ona sira seidauk iha asesu diak ba estrada.
Saturnina Sarmento, komunidade husi Likarapoma, Suku Bairo Pite, hato’o kestaun ne’e ba STL iha Bairo Pite, Sesta nee(28/08/2026).
“Durante tinan barak ona mak ami komunidade iha aldeia ida ne’e seidauk asesu estrada, tanba ami asesu deit dalan ba motor no lao ba mai. Agora transportes hanesan kareta labele tama, tanba laiha estrada,” nia dehan.
Nia hateten, bainhira komunidade sira halo uma, sasan hanesan fatuk no rai-henek tenke tula husi estrada boot mai uma liu husi dalan ki’ik.
“Ami halo uma nee, sasan hanesan fatuk no rai-henek ami lalin deit husi estrada boot. Ami tula iha gerobak ki’ik, mak tula fatuk no rai-henek husi estrada boot mai ami-nia uma,” nia esplika.
Aleinde problema asesu estrada, komunidade sira mós hateten katak durante tinan barak ona sira depende ba bee husi posu atu uza ba nesesidade lor-loron, inklui tein, haris no fase roupa.
Tuir komunidade, bainhira tempu naruk la udan, bee iha posu mós bele menus, no bainhira udan bee sai nakonu. Situasaun ne’e halo komunidade sira sente preokupasaun, liu-liu tanba to’o agora seidauk iha asesu diak ba estrada.
“Bainhira ita atu halo uma, hakarak ka lakohi ita tenke lalin sasan. Se ita lakohi lalin, ita selu ema mak lalin. Tanba ita ba tula fatuk no rai-henek, kareta fakar deit iha estrada oin, depois ita sai ba lalin mai uma,” nia dehan.
Nia mós hateten katak dalan ki’ik ne’ebé komunidade uza durante ne’e la fasil, tanba motor rua hasoru malu mós difisil.
“Dalan klot ne’ebé ami asesu durante ne’e, motor rua hasoru malu mos la diak. Ida tama tiha mai, ida seluk foin sai ba estrada. Ida ne’e mak dezafiu ne’ebé durante ne’e ami hasoru,” nia afirma.
(jac)
