DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida tolu (3) ba arguidu nain 27, ba kazu jogu online Scamming Call Centre iha Metiaut.
Iha despaisu nee, Juiz Jose Maria deside aplika medida tolu ba iha arguidu nain 27. Medida tolu nee mak hanesan, Medida Termu Indentidade Rezidensia (TIR), medida Proibisaun de Auzensia no Kausaun kada arguidu US$ 3000.
Antes nee Ministeriu Publiku (MP) iha alegasaun ba kazu jogu online Scamming Call Centre Metiaut, husu Tribunal atu aplika medida rua ba arguidu hamutuk nain 27.
Iha alegasaun nee Prokurador Rafael Gusmão solisita ba iha Tribunal atu aplika medida Kausaun kada ema ida ho osan rihun rua atus lima, no mos medida Proibisaun Auzensia.
Aleinde nee, husi parte defeza sira nian aseita ho alegasaun MP nian, konaba medida rua neebe MP husu.
Arguidu nain 27 nee Ministeriu Publiku (MP) promove ho krime Burla Informatika, Asosiasaun Kriminoza no jogu ilisitu.
Prosesu primeiru interogatoriu nee prezide husi Juiz Jose Maria, Ministeriu Publiku (MP) reprezenta husi Prokurador Rafael Gusmao, arguidu sira hetan asistensia legal husi Advogadu Privadu, Januario Martins, Octavio Cardozo, Adelina Meluk, Jose Ximenes.
(ter)
