DILI, STLTIMORLESTE.com — Timor-Leste (TL) reafirma saúde nu’udar prioridade nasional atu haforsa sistema públiku no garante asesu populasaun ba servisu saúde.
Timor-Leste reafirma kompromisu atu haforsa sistema saúde públika nu’udar baze importante ba dezenvolvimentu nasional, liuhusi prevensaun, kuidadu primáriu no asesu ba servisu saúde.
Ministra Saúde, Elia dos Reis Amaral, hatete katak kooperasaun entre nasaun, troka koñesimentu no esperiénsia, no hametin parseria sai elementu importante atu responde ba dezafiu saúde iha rejiaun.
Nia hatete, Timor-Leste hetan progresu importante iha área saúde, inklui eliminasaun filariase linfátika nu’udar problema saúde públika iha 2024, ne’ebé hetan sertifikasaun husi Organizasaun Mundiál Saúde (OMS).
Maski nune’e, nia afirma katak sei iha dezafiu saúde ne’ebé presiza atensaun, inklui malnutrisaun, saúde inan no oan, no nesesidade atu haforsa sistema saúde nasional.
“Estratéjia saúde nasional fó prioridade ba kuidadu saúde primáriu, prevensaun, diagnóstiku sedu, tratamentu no kontinuidade kuidadu iha nivel hotu-hotu, atu garante populasaun hotu-hotu hetan asesu ba servisu saúde,” dehan ministra iha abertura Sesaun 79.º Komité Rejionál OMS ba Sudeste Aziátiku, iha CCD, Segunda (07/09/2026).
Nia mós hatete katak programa saúde integradu sei aproxima servisu saúde ba komunidade liuhusi integrasaun kuidadu preventivu, diagnóstiku no tratamentu, ho prinsipiu atu la husik ema ida iha kotuk.
Ministra Saúde destaca papel profisionál saúde no traballadór saúde komunidade sira iha transformasaun sistema saúde, liuhusi formasaun, kapasitação no empoderamentu.
Iha enkontru ne’e, ministru saúde no delegasaun husi nasaun membru sira diskute kona-ba eliminasaun moras, reziliénsia sistema saúde, teknolojia saúde, saúde feto, preparasaun emerjénsia no imunizasaun.
Timor-Leste mós apela ba nasaun sira atu fahe esperiénsia no koñesimentu, atu dezenvolve solusaun saúde ne’ebé bele adapta ho kapasidade no realidade sosial no ekonómika kada nasaun.
Sesaun ne’e mós sai oportunidade atu hametin relasaun institusionál, parseria bilaterál, troka koñesimentu tékniku, mentoría no dezenvolvimentu profisionál entre nasaun iha rejiaun.
Timor-Leste mós konvida delegasaun internasionál sira atu koñese patrimóniu naturál no kulturál nasaun, ho énfaze katak ambiente saudável iha ligasaun direta ho saúde no bem-estar populasaun.
(dom)
