DILI, STLTIMORLESTE.com – Timor-Leste (TL) no Emirados Árabes Unidos (EAU) sei hametin liután relasaun bilateral iha futuru, liuliu iha área diplomazia, investimentu no kooperasaun.
Prezidente Repúblika José Ramos Horta hato’o deklarasaun ne’e ba jornalista hafoin enkontru ho Ministra Estadu iha Ministériu Negósiu Estranjeiru Emirados Árabes Unidos, Noura Al Kaabi, iha Palásiu Prezidensiál Nicolau Lobato, Bairo Pite, Segunda (31/08/2026).
Prezidente Ramos Horta hatete katak, relasaun diplomátika entre Timor-Leste no EAU la’ós foin hahú agora, maibé iha ona istória naruk no sei kontinua hametin iha futuru.
“Relasaun ho Emirados Árabes Unidos, relasaun diplomátika hahú kedas uluk hau Ministru Negósiu Estranjeiru. Hau ba Emirados Árabes Unidos, depois tinan hira nia laran. Primeiru kuandu Expo sira fó apoiu maka’as fatin ba ita iha ne’ebá, elementu ita-nia atu hela, sira fó apoiu ba ita-nia embaixada loke iha ne’ebá. Sira apoiu finanseiramente ba ita-nia embaixada, tulun ruma,” dehan Prezidente Ramos Horta.
Xefe Estadu hatete, Timor Leste konsidera EAU nu’udar nasaun amiga no kontinua buka apoiu ba prioridade nasional, inklui adezaun plena Timor-Leste ba ASEAN.
Tuir Prezidente, Timor Leste bele ko’alia ho EAU kona-ba nesesidade atu hetan apoiu no kooperasaun hodi ajuda Governu kordena no hametin Timor-Leste nia pozisaun nu’udar membru ASEAN.
Iha área investimentu, Prezidente Ramos-Horta hatete EAU mós hatudu interese atu halo investimentu iha Timor-Leste. Maibé, investidór sira presiza hetan seguransa jurídika no konfiansa liuhusi lei sira ne’ebé Governu tenke aprova.
“Too agora hein nafatin lei foun ruma ne’ebé Governu tenke aprova, nune’e atu fó konfiansa ba ema. Se ema halo investimentu ruma maibé laiha autorizasaun ida-ne’e, ida-ne’e mós sei sai problema. Tanba ne’e presiza iha lei,” hatete Prezidente.
Iha parte seluk, Ministra Estadu iha Ministériu Negósiu Estranjeiru Emirados Árabes Unidos, Noura Al Kaabi, hatete nia sente orgullu tanba bele vizita Timor-Leste no hasoru Prezidente Ramos-Horta hodi diskute oinsá atu hametin liután relasaun entre nasaun rua.
“Sente orgullu mai Timor-Leste hodi halo enkontru ho Prezidente Repúblika José Ramos Horta no iha enkontru ne’e hato’o mós komprómetu husi lideransa sira EUA, hato’o komprómetus ba Prezidente Repúblika,” hatete Noura Al Kaabi.
Nia hatutan katak, durante enkontru iha Palásiu Prezidensiál, sira diskute hamutuk kona-ba oinsá atu hametin liután relasaun entre Emirados Árabes Unidos no Timor-Leste iha futuru, liuliu liuhusi kooperasaun no komprómetu entre lideransa nasaun rua.
(eme)
