JAKARTA, STLTIMORLESTE.com — Timor-Leste ho Indonézia, iha loron Tersa (01/09/2026) hahú ronda da-haat ba negosiasaun Fronteira Marítima formál nian iha Jakarta, Indonézia, durante loron 3.
Tuir informasaun neebe STL asesu husi Media Gabinete Primeiru Ministru, Tersa (01/09/2026) katak, Negosiasaun loron tolu ne’e marka ona hodi ko’alia kona-bá delimitasaun fronteira marítima entre nasaun rua ne’e.
Delegasaun Timor-Leste lidera hosi Xefe gabinete Primeiru-Ministru no Diretora Ezekutiva Gabinete Fronteiras Terrestres no Marítima, Elizabeth Exposto no delegasaun Indonézia ne’e lidera hosi Embaixadór Ricky Suhendar.
Ofisiál superiór sira no ekipa téknika sira hosi nasaun rua ne’e sei partisipa iha diskusaun estruturadu sira bá akordu ida ne’ebé konsistente ho Lei Internasionál no Konvensaun Nasoins Unidas nian kona-bá Direitu Tasi nian (UNCLOS).
Iha abertura negosiasaun nian, Elizabeth Exposto hato’o apresiasaun bá Governu Indonézia no delegasaun Indonézia tanba sai uma-na’in bá diskusaun sira no subliña importánsia hosi delimitasaun fronteira marítima bá relasaun bilaterál entre nasaun rua ne’e.
“Ba ha’u no bá delegasaun Timor-Leste, hanesan priviléjiu ida atu kontinua diálogu importante ida-ne’e ho ita-nia kolega sira hosi Repúblika Indonézia, iha espíritu amizade, respeitu bá malu no kooperasaun ne’ebé durante tinan barak fó ona fundasaun importante bá relasaun entre ita-nia nasaun rua,” Elizabeth Exposto hateten.
Kuarta Ronda kontinua prosesu negosiasaun ne’ebé hahú ho primeira ronda iha Dili hosi 19 to’o 20 Agostu 2025. Segunda ronda hala’o iha Jogjakarta hosi 8 to’o 10 Dezembru 2025 no terseira ronda hala’o iha Singapura hosi 27 to’o 29 Abril 2026.
Negosiasaun sira-ne’e hatudu kompromisu hamutuk Timor-Leste ho Indonézia nian hodi tenta rezolve kestaun ne’e liu-hosi diálogu no ho respeitu bá Lei Internasionál.
Iha fatin seluk, Ministra Solidariedade Sosial no Inkluzaun, Veronica das Dores husu ba sarani no povu Timor oan tomak atu reza ba ekipa delimitasaun fronteira Terestres no Maritima hodi finaliza ona fronteira maritima.
“Mai ita hamutuk reja ba aman maromak hodi akompanhia ita nia ekipa delimitasaun fronteira neebe dadaun iha Indonezia-Jakarta, atu finaliza lalais,” dehan nia.
Nunee mos Jestor Postu Administrativu Nitibe, Agustinho Afulit apresia no iha esperansa atu ekipa delimitasaun fronteira bele finaliza, antes mandatu IX governu konstitusional.
(jos)
