DILI, STLTIMORLESTE.com – Visi Ministra ba Asuntu ASEAN, Milena Rangel hatete, Timor Leste (TL) kumpri ona rekezitu neebe estadu membru sira fo, tanba nee tinan ida nee (2025) TL bele adere ona ba ASEAN.
Visi Ministra ba Asuntu ASEAN, Milena Rangel hatoo lia hirak nee ba jornalista sira, bainhira remata akompanha Prezidente Republika hodi simu karta kredensial husi Embaixadora Filipina mai Timor Leste, Anne A Padua, iha palasiu Prezidensial, Nicolau Lobato, Bairo Pite, Dili, Kinta (30/01/2025).
“Hanesan informa dala barak ona katak, ita nia kriteriu 7 para bele kumpri rekizitu neebe membru sira fo ba ita, iha por volta 87 akordu instrument legal sira ita komunika hotu ona ba sekretariadu iha Jakarta nomos Estadu membru sira ita nia protidaun teknika, ita kumpri avansadu loos ona, no balu mos presiza negosiasaun bilateral, liu-liu ba akordu neebe ke kabe ba asuntu komersiu nomos pilar ekonomika nia,” dehan Milena.
Nia hatutan, Timor Leste kumpri avansadu ona, presiza negosiasaun bilateral liu-liu akordu asuntu komersiu no pilar ekonomiku.
“Pratikamente ita prosesu final ona avansa ba negosiasaun, espera katak tinan ida nee asegura ita nia adezaun, plena neebe husi implementasaun roteiru ita lao diak tebes, ita bele fo obrigada ba estadu membru sira neebe koopera diak tebes ho Timor Leste liu husi Sekretariu ASEAN nian iha Jakarta,” katak nia.
Governante nee dehan, Timor Leste konsege duni atinji maior parte husi estadu membru sira neebe espekula iha roteiru neebe Timor Leste presiza atu kumpri.
Hein simeira neebe mai, premeiru iha fulan Maiu depois simeira tuir fila fali mai iha fulan Novembru, hein lideransa ASEAN sira atu deside Timor Leste nia adezaun plena ba organizasaun ida nee.
Nunee mos Ministru Negosiu Estranjeiru no Kooperasaun (MNEK), Bendito Freitas hatutan, kona-ba Timor Leste nia adezaun ba ASEAN nee papel ida nee Visi Ministra Assuntu ASEAN nian, oras nee serbisu makaas, espera katak 2025 Timor Leste bele adezaun ba ASEAN.
“Ita servisu makaas duni ba ida nee duni, tanba nee mak politika IX Governu fo prioridade tebes no ita nia Visi Assuntu ASEAN mos servisu makaas, espera katak bele tinan ida nee tenkiser,” hatete MNEK, Bendito.
Nia hatutan, oras nee Governu hamutuk ho Prezidente Republika no ekipa esforsu makaas tinan ne Timor Leste bele ona adere ba ASEAN.
Prezidente Republika, Jose Ramos Horta hatete, nia ho Primeiru Ministru, Kay Rala Xanana Gusmão mos antes nee dehan ona katak, Timor Leste sei tama ASEAN iha tinan 2025.
(eme)