FILIPINA, STLTIMORLESTE.com – Timor-Leste (TL) prepara an atu asume lideransa ASEAN iha tinan 2029, ho kompromisu atu kontribui ba dezenvolvimentu rejionál.
Vise-Ministra ba Asuntu ASEAN, Milena Rangel afirma katak, Timor-Leste tenke kumpre responsabilidade nu’udar membru ASEAN, liuhusi prinsipiu konsensu, solidariedade no responsabilidade hamutuk.
“Ita hotu presiza respeita prinsipiu konsensu, solidariedade no responsabilidade hamutuk, atu asegura katak Timor-Leste bele kumpre nia kompromisu no responsabilidade nu’udar parte husi família ASEAN.” Vise-Ministra ba Asuntu ASEAN, Milena Rangel deklarasaun ne’e ba jornalista sira iha Media Center, Manila, Filipina, Domingu (15/11/2026).
Tuir sistema rotasaun presidénsia ASEAN bazeia ba orden alfabetika, Timor-Leste sei asume presidénsia depois Singapura no Tailándia.
Responsabilidade Timor-Leste la’ós de’it organiza eventu diplomátiku, maibé kontribui mós ba dezenvolvimentu rejionál no implementasaun planu estratéjiku ASEAN.
Timor-Leste konsidera ASEAN Community Vision 2045 nu’udar orientasaun importante ba dezenvolvimentu futuru rejiaun.
Governu hakarak sai membru ativu, ne’ebé kontribui ba esforsu global hodi hametin kooperasaun, estabilidade no prosperidade rejionál.
Iha diskusaun informal ho Ministru Negósius Estranjeirus no Kooperasaun, Bendito dos Santos Freitas, nasaun membru sira mós aborda situasaun polítika no seguransa iha rejiaun.
Asuntu Myanmar sai preokupasaun prinsipál tanba nasaun ne’e kontinua enfrenta konflitu no krize polítika.
Nasaun membru ASEAN sira presiza servisu hamutuk hodi buka solusaun ba konflitu Myanmar, liuhusi kompromisu no implementasaun akordu ne’ebé lider sira konkorda ona.
Iha kontestu ne’e, implementasaun Konsensu Pontu Lima (Five-Point Consensus) importante atu ajuda buka dalan ba rezolusaun krize Myanmar.
Mekanizmu ne’e mós buka fasilita Myanmar atu bele partisipa fali iha atividade no mekanizmu ASEAN.
Aleinde ne’e, nasaun membru sira presiza prepara mekanizmu apropriadu atu responde ba situasaun ne’ebé bele mosu iha futuru.
Preparasaun polítika no diplomátika importante atu asegura prosesu negosiasaun no tomada desizaun tuir prinsipiu ASEAN.
Timor-Leste reafirma kompromisu atu kontinua hato’o pozisaun konstrutiva no kontribuisaun pozitivu iha prosesu negosiasaun no tomada desizaun ASEAN.
(jen)
