DILI, STLTIMORLESTE.com – Timor Leste Coalition Education (TLCE) konsidera bainhira menus profesores iha eskola, sei la garantia kualidade ba ensinu aprendizajen ba estudantes sira.
Asuntu nee hatoo husi Diretor Ezekutivu TLCE, Jose Monteiro ba STL, Segunda nee (02/12/2024).
“Eskola sira neebe daudaun nee enfrenta menus profesores, iha posibilidade atu kontinua la iha profesores ba departementu no materia balun, tanba la iha indikasaun ruma iha OJE 2025 neebe iha planu atu solusiona dezafiu ida nee, nia impaktu mak departementu sira iha ESTV tenke sofre taka, ensinu baziku, estudante kontinua labele aprende ho diak tanba la iha profesores,” dehan Monteiro.
Tuir Jose katak, bainhira Ministeriu Edukasaun (ME) laiha planu atu halo rekrutamentu ba profesores, liu-liu ba ensinu sekundaria no tekniku vokasional mak dezafiu profesores menus eskola sira sei kontinua. Ida nee sinal la diak dezenvolvimentu ba kualidade edukasaun, tanba la eziste no la garantia kualidade aprendizajen bainhira elementu importante liu hanesan profesores mak la iha ka menus.
(jac)
