DILI, STLTIMORLESTE.com – Tribunal Judisial Primeira Instansia Dili liu husi Juiz prosesu deside absolve arguidu ho inisial NM, tanba konsidera la provadu ba iha krimi neebe Ministeriu Publiku akuza ba.
Iha sala julgamentu laran loron Segunda, Juiz Ivan Suritai deklara katak, ba prosesu ida nee iha sala julgamentu laran arguidu hili direitu silensiu.
Tribunal deklara, lezadu AF Tribunal notifika sertidaun negativa la marka prezensa iha Tribunal. Tanba nee Tribunal labele halo konfirmasaun ba prosesu refere, tanba ema neebe hanesan vitima la marka prezensa iha Tribunal hodi reforsa akuzasaun neebe iha.
Ho ida nee, Tribunal haree katak, la prienxe ba krimi neebe iha, la provadu ba faktus sira neebe iha, hodi ikus mai deside absolve arguidu husi krimi refere.
Tuir akuzasaun neebe iha katak, iha loron 5 fulan Marsu tinan 2023 lezadu ba buka arguidu iha nia fatin atu husu tuir, arguidu hola tiha lezadu nia feton no liu tiha ona tinan rua, maibe ikus mai arguidu lakohi ba uma.
Maibe lezadu foin tun husi karreta, derepente deit arguidu hakat ba la koalia buat ida, tebe kedas dala ida kona lezadu nia knosen no lezadu monu kedan tun ba rai, lezadu nia liman no ain kona alkatraun kanek no raan.
Mezmu nunee arguidu kontinua tebe dala barak iha lezadu nia kotuk laran, no tuku tan dala ida iha tilun hun hodi rezulta moras.
Tanba nee, Ministeriu Publiku akuza arguidu komete krimi Ofensa Integridade Fizika Simples neebe previstu iha artigu 145 husi Kodigu Penal.
Audensia julgamentu nee prezide husi Juiz Singular Ivan Suritay, Miniteriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku nain ida.
(ter)
