DILI, STLTIMORLESTE.com – Kualidade infraestrutura iha kapital Dili hetan reasaun makaas husi parte akademista sira. Liu liu iha area turistiku Kristu Rei, neebe sai nuudar odamatan turizmu Nasional, maibe realidade iha terrenu hatudu trotoar sira komesa naksobu no nakfera, maski foin entrega deit husi kompanhia implementador sira, iha tinan ida liu ba.
Akademista UNPAZ, Domingos Soares Pinto kestiona makaas sistema fiskalizasaun husi Governu neebe konsidera matan delek ka fraku tebes hasoru kompanhia sira. Tuir sira estraga neebe akontese iha tempu badak nee hanesan prova katak, kualidade material neebe uza la tuir padraun tekniku (BoQ) neebe fiksa ona iha kontratu.
“Ita labele husik osan povu nian sai deit hanesan lixu iha tasi ninin. Kristu Rei mak ita nia odamatan ba mundu, maibe kualidade trotoar iha neeba lamentavel tebes. Se Governu la foti medida rigorozu, kompanhia sira sei kontinua buka lukru boot hodi sakrifika kualidade obra,” dehan Domingos ba STL, Iha Surikmas, Dili, Kuarta (08/04/2026).
Hanesan Akademiku, Domingos sujere ba Ministeriu Obras Publika (MOP) atu la selu projetu sira neebe kualidade la tuir standard, no obriga kompanhia sira hodi halo reparasaun uza sira nia osan rasik durante periodu garantia.
“Ami mos husu ba Komisaun Anti Korupsaun atu bele tun ba terenu hodi bele fiskaliza posibilidade korta material neebe prejudika interese publiku no imajen turizmu nasional,” dehan nia.
Iha parte ketak, Observador Politika, Martinho de Araújo mos preokupa ho situasaun nee. Nia konsidera katak Governu gasta ona osan milionáriu husi kofre Estadu, maibe rezultadu fiziku neebe iha hanesan deit, projetu provizoriu neebe la tahan ba tinan naruk.
“Nee estraga deit povu nia osan. Tinan ida halo, tinan oin aat, depois gasta fali osan ba manutensaun, nee siklu dezenvolvimentu ida neebe la diak ba ekonomia nasaun nian,” dehan Observador Politika nee.
Entretantu, Antes nee Ministru Obras Publika, Samuel Marcal hatete, sira sei foti medida rigorozu hasoru kompanhia sira neebe implementa projetu la tuir padraun neebe iha.
(car)
