DILI, STLTIMORLESTE.com – Padre Wendelinus Jebatu, SVD hatete, ukun nain laos deit atu sai lider politika ka lider boot ba komunidade ka grupu ida, maibe importante liu mak oinsa ukun ba dalan loos nian.
Padre nee dehan, nuudar ema Kristaun tenke tau iha hanoin no konsiensia katak sai ona Jesus Nia Eskolante, sai nia saseluk, no nia liman ain, hodi halao nia misaun iha mundu nee.
Nunee mos batizmu hanesan portaun ida ba ema atu hola parte iha knaar santu Jesus Kristu nian. Wainhira simu batizmu, simu direita knaar tolu husi Jesus rasik, katak knaar liurai, knaar nailulik no knaar profetik.
“Knaar liurai, iha korelasaun oinsa ita sai ukun nain. Ukun nain laos deit atu sai lider politika ka lider boot ba komunidade ka grupu ida, maibe importante liu mak oinsa ita ukun ita nia moris pesoal ba dalan loos nian. Kada pesoal, ita hotu sai liurai ba ita aan rasik. Tanba wainhira ita seidauk bele ukun no forma ita aan rasik, lalika hanoin no mehi atu ukun no forma ema seluk nia moris. Ukun moris rasik sai diak foin ukun ema seluk, atu sira laos deit ita nia ordem, maibe sira haree liu ita nia moris nuudar ezemplu ka sasin diak ida. Sai masin no sai noroman atu ema seluk bele haree no sente ita nia prezensa,” dehan Padre Wendelinus liu husi reflesaun iha selebrasaun aniversariu STL ba dala 32, iha Knua STL, Surikmas, Dili, Sabadu (01/02/2025).
Knaar Nailulik tuir Pe. Wendelinus iha korelasaun ho knaar halulik aan ka hasantu aan, hodi nunee bele sai ezemplu diak ba ema seluk no konvida ou dada ema seluk ba dalan santu nian. Ema nia objetivu moris nuudar fiar nain, liu-liu ema Kristaun mak atu sai santu no lao iha dalan santu tuir Maromak nia hakaran no tuir Jesus nia hanorin.
Tanba knaar profeta hatudu liu husi prontudaun atu haklaken Maromak nia liafuan, haklaken kona-ba Maromak nia ukunfuan sira, haklaken Jesus Nia Evanjelhu atu sai nuudar mata dalan ba moris.
Knaar tolu nee, knaar Igreja nian, katak responsabilidade ema kristaun hotu, tanba konsekuensia husi batizmu neebe simu. Tanba nee, wainhira koalia kona-ba Igreja, nee laos deit Amu Papa ka Amu Bispu sira. Igreja laos Amu Lulik sira ka madre sira, laos relijiozu/a, maibe ema hotu, ema Kristaun sira neebe hasantu aan tiha ona ho bee no mina batizmu. Knaar tolu nee knaar baptizadu nian. Ema hotu neebe simu batizmu simu mos responsabilidade Jesus Kristu nian. Ho batizmu laos iha direitu ba salvasaun nian deit, maibe mos iha dever ka responsabilidade ba ema nia salvasaun, nee duni atu salva ema presiza utilija moris ho diak nuudar nailulik, liurai no profeita.
(eme)