DÍLI, STLTIMORLESTE.com – Implementasaun projetu alargamentu estrada iha area Manleuana hamosu deskonfiansa boot husi publiku no kestionamentu husi parte akademista sira. Tanba uma komunidade nian barak mak tenke haruka rahun hodi fo fatin ba dezenvolvimentu, maibe uma husi Ministru Obras Publika, Samuel Marcal nian fali mak seguru hela, maski tuir kordenada lina reta estrutura refere tenke kona mos projetu nee.
Komunidade neebe hela iha lina alargamentu nian senti katak, iha diskriminasaun ba aplikasaun lei no dezenhu tekniku. Uma nain sira neebe hela besik iha área neeba tenke simu realidade katak sira nia hela fatin ka uma tenke haruka rahun hodi tuir planu governu nian, maibe sira kestiona tanba sa mak tenke iha tratamentu espesial ba kargu boot nian.
“Ita apoiou dezenvolvimentu maibe dezenvolvimentu nee tenke aplika ba sidadaun hotu hotu. Se ami nia uma mak kona lina reta tenke rahun, tanba sa Ministru nian fali mak estrada nee tenki halo desviu ka putar fali hodi salva Ministru nia uma, nee hatudu katak privilejiu ba kargu boot sira, maski povu seluk sakrefika ona sira nia hela fatin,”dehan sidadaun ida neebe hela iha area Manleuana, Díli, Rosário da Silva ba STL, Kuarta (15/04/2026).
Hanesan komunidade, Rosário dehan sira laiha kbiit atu defende sira nia direitu, tanba hasoru malu ho poder boot.” Ami povu kiik nee hanesan deit rai rahun, se Governu dehan dudu, dudu duni, maibe ami so husu deit justisa,” hatete Rosário ho triste.
Iha parte ketak Akademista UNPAZ, Jaime de Oliveira nia haree kazu nee hanesan ezemplu, ida neebe la diak ba Governasaun neebe transparante.
Tuir nia lina kordenada ba estrada nasional ka urbana tenke bazeia ba estudu tekniku neebe fiksa, laos bazeia ba interese pesoal.
“Bainhira planeamentu urbana ida transforma deit hodi proteje interese pesoal husi membru Governu ida, ida nee ita bele bolu katak abuzu de poder. Nee hatudu katak lei laos ba sidadaun hotu, maibe ba deit sira neebe laiha kbiit,” kestiona Jaime.
Akademista nee husu ba Governu atu fo eplikasaun tekniku neebe transparante no husu ba Orgaun fiskalizador sira atu haree kazu nee, hodi labele kria fali kultura ida katak, poder bele proteje kualker Sasan husi regra neebe estadu rasik kria.
Entretantu too notisias nee STL publika, parte Ministeriu Obras Publika (MOP) seidauk fo resposta ofisial, kona-ba kestaun mudansa kordenada iha area Manleuana neebe salva Ministru Obras Publika, Samuel Marcal nia uma husi risku alargamentu estrada nian. Maibe publiku hein hela esplikasaun tekniku ida neebe mos bele konvensa katak desizaun nee bazeia duni ba kriteira fiziku, laos tanba kargu neebe Ministru nee kaer ka asumi ba.
(car)
