DÍLI, STLTIMORLESTE.com – Universidade sira nia knaar mak fahe matenek no prepara estudante ho abilidade atu tama mundu servisu, enkuantu responsabilidade atu kria kampu traballu envolve Governu no setór sira seluk.
Liafuan hirak-ne’e hato’o husi Vice-Reitor II Universidade de Díli (UNDIL), Tomás Augusto Correia, ba STL iha Kampus UNDIL, Segunda-feira (26/10/2026).
Nia dehan katak, universidade nia responsabilidade mak hanorin no fó treinamentu ba estudante sira atu iha koñesimentu no abilidade ne’ebé permite sira kria servisu ba an rasik ka servisu iha instituisaun Governu, setór privadu, ONG no instituisaun sira seluk.
“Universidade la’ós mak loke kampu traballu, maibé oinsá hanorin no prepara estudante sira, fó treinamentu atu sira bele kria servisu ba an rasik no fó servisu ba ema seluk, ka servisu iha instituisaun Governu, setór privadu, ONG no seluk tan,” dehan Tomás.
Nia esplika katak, estudante sira tenke prepara an durante prosesu aprendizajen, atu siénsia ne’ebé sira aprende iha universidade bele aplika iha moris loroloron, la’ós hein de’it Governu atu fó servisu ba sira.
Tuir nia, universidade tenke forma estudante sira atu sai matenek no iha abilidade profisionál, hodi bainhira remata estudu, sira bele hamriik ho sira-nia an rasik no hahú atividade ekonómika ki’ik ne’ebé bele kria rendimentu ba família no oportunidade servisu ba ema seluk.
Nia enfatiza katak, universidade iha dever no obrigasaun atu fó treinamentu ba estudante sira durante tinan haat estudu nian, atu depois de graduasaun, sira iha koñesimentu no abilidade ne’ebé sufisiente atu kria servisu ba an rasik no kontribui ba dezenvolvimentu nasaun.
(joa)
